Presentación de ‘Indianu’ de Luis Navazo

El vienres 15 d’avientu, a les 19:30 hores, nel salón d’actos de l’Antigua Rula de Xixón, va presentase’l llibru Indianu, de Luis Navazo. Va intervenir, xunto col autor, Cristóbal Ruitiña.

Indianu ye una destacada novela gráfica (ganadora del VIII Premiu «Alfonso Iglesias» de Cómic) que realiza una perinteresante indagación nun aspectu bien escuru de la nuestra hestoria: el tráficu d’esclavos africanos con destín a les Antilles, sobre que les sos escures bases cuayáronse tantes fortunes de los que se dieron en llamar indianos. Les vides de los sos protagonistes son vides cruciaes, cuando non quebraes, metanes la opresión y de la violencia política de finales del sieglu XIX y primeros del XX, allumaes pol espertar de la conciencia de clase y de nuevu asombraes pola Guerra Civil.

Luis Navazo (Raíces, 1976) ye profesional de la fotografía y fotoperiodista pa dellos medios y axencies: El Comercio, El Diario de Menorca, El Periódico de Cataluña, El Diario de Mallorca… Nel ámbitu audiovisual collaboró nos informativios de la Televisión del Principáu d’Asturies (TPA) y contribuyó a fundar la productora Zatopek Studio. Vive en Xixón y desenvuelve la so actividá profesional compaxinándola cola docencia y el so llabor d’ilustrador y autor de cómics.