Taller de llectura n’asturianu en Corvera

Dende esta selmana y hasta’l 18 de marzu inclusive, ábrese’l plazu pa inscribise nel “Taller de llectura n’asturianu” que quier ser una manera d’acercase a la lliteratura asturiana actual y d’afondar nel conocimientu de la llingua asturiana.

El taller, gratuitu, ye una iniciativa de la Casa de la Llingua del Ayuntamientu de Corvera, en collaboración col área de Cultura del Ayuntamientu de Mieres, y va ser impartíu pol técnicu responsable del Serviciu de Normalización Llingüística de Corvera, Rafael Rodríguez Valdés.

El taller, qu’emprima en marzu y que va siguir desarrollándose a lo llargo l’añu, consiste en dos sesiones: na primera, el responsable de la Casa de la Llingua empresta un exemplar del llibru seleccionáu a cada persona inscrita nel taller y va introducir a la obra de los y les autores escoyíos/es ; na segunda, que se celebrará un mes depués, los y les participantes nel taller van disfrutar d’un alcuentru lliterariu col/a autor/a del llibru. Asina les coses, recomiéndase a les persones interesaes tener conocimientos de llingua asturiana y ganes de disfrutar de la llectura.

Les places pa esti taller son limitaes (diez).

Inscripciones nos rexistros del conceyu hasta’l 18 de marzu; la primer sesión del taller va facese nel Centru Sociocultural de Las Vegas/Les Vegues el xueves 19 de marzu a les 19 hores.