Veranu Lliterariu 2015 en Corvera

Veranu Lliterariu ye una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desarrollase a lo llargo de los meses de xunetu y agostu na Biblioteca de Las Vegas/Les Vegues.

Tala actividá, d’asistencia llibre y gratuita, consiste n’alcuentros ente escritores y tolos/es neños/es que quieran asistir; cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos.

La llectura de los cuentos suel vese acompañada d’otres actividaes más, como pueden ser pintar, xuegos de memoria, cantar, y de magar.

Los alcuentros van facese tolos llunes de xunetu y agostu n’horariu de les 11:30 a les 12:30 hores, y nellos va facese un esfuerzu por amosar la diversidá y pluralidá de la lliteratura asturiana d’anguaño, participando nos mesmos autores como Aránzazu Prado García-Jove, Susana Sela, Esther García, Xurde Fernández, Carlos González Espina, Cristina Muñiz o Berto García.