Ángeles Carbajal presenta ‘En campu abiertu’, poemariu ganador del Teodoro Cuesta 2012

Los escritores Xuan Bello y Marta Mori van faer de maestros de ceremonies nel actu de presentación del llibru En campu abiertu, obra cola que la so autora, Angeles Carbajal, algamara’l XXII Premiu Teodoro Cuesta de poesía n’asturiano.

L’actu tendrá llugar nel Salón d’Actos del Club de Prensa La Nueva España, n’Uviéu, el próximu xueves día 28 de payares, a les siete la tarde.

El Xuráu del premiu destacara na concesión del mesmu la sorprendente voz propia d’una poeta hasta agora casi inédita, pero dafechu bien formada. Facía yá ocho años desque’l premiu de poesía tuviera como ganadora una muyer, dempués de qu’en 2004 Marta Mori -qu’agora presenta esta obra- s’alzase col galardón, recoyendo’l testigu del añu anterior, en que lo ganara Vanessa Gutiérrez; Ángeles Carbajal suma’l so nome al d’autores como Esther Prieto, Lourdes Álvarez o Berta Piñán, ganadora de la primer edición del premiu, en 1991.

Publicada por Trabe na so colección de poesía, En campu abiertu ye una obra homoxenia na qu’una voz fecha, madura y personal ye a emocionar al traviés d’unos poemes n’apariencia cenciellos, nos que los temes qu’interesen y angustien al ser humanu (el pasu del tiempu, l’amor o la muerte) van apoderando los versos y señoriando’l conxuntu.

Si la bona lliteratura (y, poro, la bona poesía) ye aquella que nos vuelve distintos en lleéndola, esti poemariu cumple por demás con esta premisa; naide nun va quedar indiferente ente versos como estos:

«Que me parta un rayu; ¿a quién-y lo pido?

Que la muerte nun m’agarre a un goteru

que xuegue llimpio,

que me pille en campu abiertu».

Ángeles Carbajal (Argüelles –Siero-, 1959). Llicenciada n’Hestoria del Arte pola Universidá d’Uviéu, ye conocida ente los llectores asturianos por haber empobináu diversos talleres de llectura y creación lliteraria p’adultos promovios pola Obra Social y Cultural de Cajastur y tamién pol Conceyu d’Uviéu. Collaboradora en revistes Lliteraries como Reloj de Arena y Clarín, foi una de les impulsores de l’asociación lliteraria “Voces del Chamané”. Tien publicaos los llibros La Caligrafía de la Distancia (Cuadiernos del Bandoleru, 1993) y La sombra de otros días, (Editorial López y Malgor, 2002).