33 Selmana de les Lletres Asturianes

El Gobiernu asturianu dedica la 33 Selmana de les Lletres Asturianes a los autores de la Ilustración asturiana y en concretu a los poetes Benito de l’Auxa (1742-1814) y Antón Balvidares (1751-1792), dos escritores de la llamada «xeneración del mediu sieglu».  Cohesionaos so la influencia de Xovellanos como parte del grupu de los “Bableferidos”, asumieron la visión renovadora y crítica que suponía l’espíritu ilustráu y al traviés d’un refináu cultivu lliterariu en llingua asturiana enfrentáronse a les formes del Antiguu Réxime dominante nesos momentos del XVIII y que duraría hasta entamos del XIX.

El programa d’actos que’l Gobiernu d’Asturies preparó pa homenaxar a estos autores, cuntando en tou momentu cola collaboración de toles entidaes públiques y privaes comprometíes, inclúi ente otros, la celebración de dellos actos de calter institucional, presentación de llibros y recitales, dramatizaciones o actividaes escolares, así como la publicación de dos importantes obres preparaes espresamente pa la ocasión: Al rodiu de la poesía ilustrada, volume colectivo qu’inclúi artículos, estudios y collaboraciones de 8 prestixosos escritores ya investigadores asturianos; y Poesíes, obra completa conocida de los dos autores, compilada y presentada con estudiu críticu a cargu del profesor del Seminariu de Filoloxía Asturiana de la Universidá d’Uviéu, Xuan Carlos Busto Cortina.

Los actos d’homenaxe a Benito de l’Auxa y Antón Balvidares y a les lletres asturianes van tener llugar dende’l llunes, 30 d’abril hasta’l vienres 4 de mayu por toa Asturies con actos y eventos concretos n’Uviéu, Xixón, Grau y Santalla, amás de los conceyos orixinarios de los homenaxaos: Carreño y Sariegu. Nellos van collaborar un bon númberu de persones, ente estudiosos, escritores, dramaturgos, etc. Ye de destacar tamién la participación de la comunidá educativa y, bien especialmente, la collaboración del Colexu Públicu Salvador Vega Berros, de Vega (Sariegu) centru que va acoyer l’actu escolar de celebración d’esta Selmana. L’actu de Sariegu cuntará tamién con la asistencia de miembros de la familia Fernández-Vega, descendientes del poeta homenaxeáu Antón Balvidares.

La Casa Natal de Xovellanos ye l’escenariu nel que se va celebrar –el llunes 30 d’abril a les 12:30hores– la presentación de los actos d’esta 33 Selmana de Les Lletres Asturianes y de la primera de les dos ediciones conmemoratives: Al rodiu de la poesía ilustrada, al cargu de Juan Carlos Villaverde Amieva, profesor tamién del Seminariu de Filoloxía Asturiana de la Universidá d’Uviéu.

Esi mesmu día llunes 30 d’abril, a les20:00hores, na Capiella de los Dolores de Grau y en collaboración cola Fundación Aula de les Metáfores, va celebrase un doble actu: la representación de l’adaptación teatral de “Píramo y Tisbe”, de Benito de l’Auxa, por Producciones Nun Tris; y, de siguío, un Actu poéticu n’homenaxe a los dos poetes ilustraos nel que van participar l’investigador Xuan Bustu y los poetes Antón García y Sofía Castañón.

La Selmana de les Lletres Asturianes va siguir con actos y eventos de nuevu dende’l miércoles 2 de mayu hasta’l vienres 4 de mayu. En concretu:

Miércoles, 2 de mayu:

• La presentación del llibru Poesíes, de Benito de l’Auxa y Antón Balvidares, al cargu de Xuan Busto Cortina, profesor de la Universidá d’Uviéu, a les13:00 hores nel Paraninfu de la Universidá d’Uviéu.
• Un homenaxe institucional del Conceyu de Carreño, col descubrimientu d’una placa n’homenaxe al autor Benitu de l’Auxa, na Biblioteca Carlos González Posada a les19:30y, de siguío, la conferencia “El poeta candasín Benitu de l’Auxa: ente Marirreguera y Xovellanos” por Xuan Busto.

Xueves, 3 de mayu:

• A les19:00hores en La Casa Riba (Valvidares, Sariegu), descubrimientu d’una placa n’homenaxe al poeta Antón Balvidares na so casa natal.
• Una hora más tarde, a les 20 hores, na Casa la Cultura de Vega, Sariegu, Florencio Friera Suárez, profesor de la Universidá d’Uviéu va ufiertar la conferencia “Antón Balvidares Argüelles: un poeta sareganu de la Ilustración asturiana”.

Vienres, 4 de mayu:

• Tol día: Día del llibru n’asturianu, en collaboración con 53 llibreríes de toa Asturies, que van realizar descuentos na compra de llibros n’asturianu y van regalar la edición conmemorativa Al rodiu de la poesía ilustrada.
• A les12:00hores, actu escolar institucional de celebración de la Selmana de les Lletres Asturianes, entamáu pola Conseyería d’Educación y Universidaes del Principáu d’Asturies nel Colexu Públicu Salvador Vega Berros de la capital saregana.
• Los actos van piesllase na Casa la Cultura de Santalla d’Ozcos cola conferencia “Delas señas da Ilustración na Asturias occidental” por José Antonio Álvarez Castrillón, de la Universidá d’Uviéu.