Presentación de ‘Nel ríu la Fame’ de Pilar Arnaldo

El sábadu día 19 d’avientu preséntase, nel Hotel Palaciu de Merás de Tinéu a les 18:00 hores, el llibru de relatos de Pilar Arnaldo Nel ríu la fame, ocho cuentos d’una autora que s’estrena escribiendo n’asturianu. Amás de l’autora van  presentar el llibru Esther Fonseca y Marta López Fernández.

Pal so primer llibru, Pilar Arnaldo decide cuntar un momentu estraordinariu qu’asocede na vida de seis muyeres: una neña qu’ameyora gracies a l’acción sanadora d’un mineru «fugáu»; una madre a la que timen los señoritos de la villa por nun saber lleer, pero que ta dispuesta a que la hestoria nun se repita cola so fía; una moza a puntu de parir que crucia sola, dormiendo nel monte, la llarga distancia que separa la cárcel de la qu’acaba de salir de la casa onde quier que naza la so criatura; dos namoraes a les que l’amante abandona obligándoles a arrenunciar al amor pal restu de la vida… Y Gloria, acabante casar, a la que casi maten de fame na casa que la recibe y que cunta a la nieta la reacción violenta que-y dexó camudar de vida.

Seis llabradores nun tiempu nel que les families probes nun yeren dueñes del so destín, de cuando les muyeres taben condergaes a la obediencia y a la resignación. Seis protagonistes que viven alredor d’esi ríu la Fame, que consiguen sobreponese a la calamidá pa enfrentar la vida con determinación y valentía y a les qu’esti llibru da voz nel so propiu llinguaxe.

Pilar Arnaldo (La Pontecastru, Tinéu 1964). Llicenciada en Filoloxía Hispánica, llectora devota (Dickens, Verne, Márquez, Lorca, Machado…), el so pasu pola Universidá d’Uviéu nos años ochenta dexó-y conocer en persona lo meyor de la lliteratura escrita n’asturianu cuando se taba desenvolviendo. Profesora de secundaria y bachilleratu en Galicia, volvió d’ellí con Rosalía, Curros Enríquez, Celso Emilio Ferreiro o Blanco Amor. Agora pon clase nel Institutu de Tinéu, actividá que compaxina con xeres de reivindicación y defensa del mundu rural.