Presentación en Piedrasblancas de ‘Yo taba ellí’ de M.ª Esther García López

El xueves 26 de payares na Sala Polivalente del Valey Centro Cultural (Piedrasblancas) a les 20:00 hores, presentase el llibru Yo taba ellí de M.ª Esther García López. Presenta: Roberto González Quevedo, profesor de la Universidá d’Uviéu y miembru de númberu de l’Academia de la Llingua Asturiana.

Yo taba ellí ye un volume conformáu por ventiún rellatos de distinta factura y temática, a los qu’aune’l mesmu filu: la presencia de quien narra nel sitiu o llugar nel que trescurre l’acción: ella taba ellí, yo taba ellí. Escritos cuando n’asturianu estándar, cuando na variante occidental, que ye la llingua materna de l’autora, aquellos rellatos que retraten la vida na Asturies rural, lo más d’ella yá perdida pero que tovía se caltién viva na memoria de quien narra y de la xente del llugar, son los qu’algamen mayor fondura psicolóxica y maña descriptiva.

María Esther García López (La Degol.lada, Valdés), escritora n’asturianu y castellanu, tien gran númberu d’obres publicaes d’estremaos xéneros: didáctiques y pedagóxiques, etnográfiques y llingüístiques, llibros de testu ya infantiles. Na so obra poética rescamplen los poemarios L.luribaga (2003), Zamparrampa (2004), Tiempu d’iviernu (2005), Faraguyas (Haikus) (2007) o Pisadas (2008). En narrativa destaquen El tatuaxe (1998), Historias de vida ya señas de muerte (2005) y A la gueta l’amor (2010). Tou esti llabor lliterariu valió-y p’algamar dellos premios, tanto en narrativa como en poesía. Dalgunos de los sos poemes tán musicalizaos por Ernesto Paredano y publicaos nel discu Alebrix (2007).