39.ª edición de la Selmana de les Lletres Asturianes | Biblioasturias
39.ª edición de la Selmana de les Lletres Asturianes

La 39.ª edición de la Selmana de les Lletres Asturianes va dar protagonismu a la lliteratura infantil y xuvenil, un aspectu que la Conseyería d’Educación y Cultura considera fundamental pa la creación de los vezos llectores n’asturianu y gallego-asturianu ente los más mozos. Del 27 d’abril al 8 de mayu, más d’una ventena d’actividaes incorporáronse al programa diseñáu pa la ocasión: talleres, esposiciones, homenaxes, presentaciones de llibros, llectures públiques, certámenes lliterarios, alcuentros escolares, entregues de premios, visites guiaes, conciertos, representaciones teatrales… Son nueve los conceyos que collaboren nesta edición dexando los sos espacios pa delles de les actividaes.

La Selmana empieza’l vienres 27 d’abril, siendo l’actu inaugural, a les siete de la mañana, la celebración del Alba de les Lletres Asturianes na escuela de Llorgozana (Carreño), que se va rematar con un taller sobre la obra d’Antón de Marirreguera, el primer autor conocíu n’asturianu. Nesa mañana, en Santolaya (Cabranes) va celebrase un homenaxe a la escritora cabraniega María Josefa Canellada y va representase una adaptación teatral de la so obra Montesín, mentes que nel Centru de Cultura Antiguu Institutu de Xixón va inaugurase la esposición Falar ensin parar, que va tar abierta hasta’l domingu 20 de mayu.

El llunes 30 d’abril empiecen les visites guiaes en llingua asturiana per delles localidaes: esi mesmu día n’Avilés, el martes 1 de mayu n’Uviéu, el 2 de mayu en Xixón y la fin de selmana, 5 y 6 de mayu, en Ribeseya.

El miércoles 2 de mayu, la Xunta Xeneral del Principáu va acoyer la yá tradicional llectura pública institucional de testos n’asturianu y gallego-asturianu. Esa mesma tarde, a les 19:00,va celebrase nel auditoriu de Siero l’espectáculu musical Xentiquina: una mirada a la lliteratura infantil, mentes qu’a les19.30 hores, en collaboración cola Fundación Aula de les Metáfores de Grau, van entregase nesta localidá los diplomes del V Premiu de Poesía que se convoca pal alumnáu d’esi conceyu, amás d’acoyer un actu poéticu musical cola presencia de Pablo X. Suárez, ganador del Premiu Xuan María Acebal de Poesía 2017.

La VI Feria del Llibru y Discu n’asturianu, entamada col Conceyu d’Avilés y l’Asociación de Llibreríes del Principáu d’Asturies, inaugúrase’l xueves 3 de mayu cola presentación de les ediciones conmemoratives Cúntame un cuentu y Cúntame un conto, dos obres, n’asturianu y gallego-asturianu respectivamente, que cunten con rellatos infantiles y xuveniles de 18 autores y ilustradores de toa Asturies. Estos dos llibros van regalase’l vienres 4 de mayu, Día del Llibru Asturianu, en 53 puntos de distribución d’Asturies al mercar llibros y discos n’asturianu o en gallego-asturianu. La Feria, instalada nuna carpa na plaza Domingo Álvarez Acebal, va tar abierta hasta’l día 6 de mayu con más presentaciones de llibros, sesiones de cuentacuentos, conciertos y alcuentros lliterarios.

Nel programa de la Selmana, Corvera inclúi trés actos: el miércoles 2, Versovera, un alcuentru poéticu nel centru cultural de Les Vegues; el vienres 4, nel Teatru El Llar, la obra Crisis y otres histories, d’Adolfo Camilo Díaz; y el llunes 7, el recital poéticu Los testos de los músicos del país como piecines de teatru.

El públicu infantil y xuvenil ye’l protagonista d’esta Selmana. El xueves 3 de mayu, a les 18.00 hores, el Teatru de Llaboral Ciudá de la Cultura va acoyer la gala d’entrega de premios del V Certame de Teatru Escolar. El vienres 4, l’IES Víctor García de la Concha de Villaviciosa va ser l’escenariu del actu escolar institucional de celebración la Selmana de les Lletres cola entrega de los premios de los certámenes artísticu y lliterariu. Tamién pal públicu escolar tán pensaos los espectáculos El viaxe de Dorothy y Quixote, nel Teatru de Llaboral Ciudá de la Cultura, el llunes 7 y el martes 8 de mayu, respectivamente, dambos a les11.00 hores.

El gallego-asturianu va tar presente nel Auditoriu As Quintas, d’A Caridá (El Franco), el sábadu 5 de mayu, a les 19.00 hores, col Homenaxe ás nosas lletras, que nesta ocasión va consistir nuna representación d’As miserias de Llázaro de Tormes, al cargu de Carlos Alba, Cellero. Trátase d’una versión en gallego-asturianu de la obra Llázaro de Tormes, ganadora del I Premiu Nel Amaro de Teatru profesional n’asturianu, que va poder disfrutase tamién nel Teatru Vital Aza de La Pola (L.lena) al otru día, a les20.00 hores.

El programa d’actos zárrase’l martes 8 de mayu na Sala Borrón d’Uviéu, cola tercer edición d’Entaína a escribir, un concursu de microrrellatos improvisaos n’asturianu pa la mocedá que se convoca en collaboración col Institutu Asturianu de la Muyer y Polítiques de Mocedá.

Programa d’actos

(25 de abril de 2018)

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias