Ángeles Carbajal gana’l XX Premiu Xuan María Acebal de poesía

La concesión de los premios lliterarios n’asturianu que cada añu convoca la Conseyería d’Educación, Cultura y Deporte del Gobiernu del Principáu d’Asturies termina de ser completada col fallu del Premiu Xuan Marcía Acebal de poesía, que nesta edición fue pa la obra L’aire ente la rama del que ye autora Ángeles Carbajal.

Ganador por unanimidá d’esti prestixosu galardón que llega a la convocatoria númeru venti, el poemariu presentáu col nomatu d’Entel fue destacáu ente los once orixinales que se presentaren por “la voz personal y madura cola que se va costruyendo un poemariu harmónicu y de gran intensidá rítmica”. Asina lo espresó un xuráu compuestu polos escritores Pablo Texón y Sofía Castañón, el filólogu Luis Casteleiro, y presidíu pola directora xeneral de Política Llingüística, Ana María Fueyo.

Ángeles Carbajal (Argüelles, Siero, 1959) ye llicenciada n’Historia del Arte pola Universidá d’Uviéu. Colaboradora de la revista Clarín y directora de talleres literarios organizaos pol Ayuntamientu d’Uviéu o Cajastur, ye autora de los poemarios en castellán La caligrafía de la distancia (1993) y La sombra de otros días (2002), asina como del poemariu n’asturianu En campu abiertu, col que se fixo en 2012 col Premiu Teodoro Cuesta de Poesía que convoca l’Ayuntamientu de Mieres.

Fotografía: MJ Flórez