Atles de los Bolos Asturianos

Atles de los Bolos Asturianos

Carlos Suari

Suburbia      

68 páx.

///

Carlos Suari plasma en papel el so estensu llabor y trabayu de campu nun ámbitu d’estudiu que, a pesar de lo que pueda paecer, nun taba esploráu. El propiu autor nos indica que’l Atles de los Bolos Asturianos nun ye un manual de bolos, ye un estudiu de toes les modalidaes de bolos asturianos acompañaes de imáxenes, dibuxos y mapes, que tracen un estudiu seriu y rigurosu d’una de les señes d’identidá de la cultura asturiana.

Asturies bien podía considerase la capital mundial de los bolos. Y ye que de les realidaes bolístiques conocíes, l’asturiana rescampla por complexidá y densidá. L’Atles de los Bolos Asturianos surdió como una investigación en cata de los rasgos más trescendentes y fondos de caún d’estos xuegos, cola fin de ponelos darréu en correspondencia con dellos aspectos socioculturales, nuna rellación qu’abriera camín al cartografiáu d’esti patrimoniu.