Carlos González Espina, Premiu María Xosefa Canellada de Lliteratura Infantil y Xuvenil

L’escritor Carlos González Espina ye’l ganador de la sétima edición del Premiu María Xosefa Canellada de Lliteratura Infantil y Xuvenil en llingua asturiana, que concede la Conseyería d’Educación, Cultura y Deporte. El premiu, pola obra Cápsules de tiempu, ta dotáu con 3.000 euros.

El xuráu encargáu de valorar los ocho trabayos presentaos nesta convocatoria, formáu polos escritores y especialistes en lliteratura infantil y xuvenil Lourdes Álvarez García, Iris Díaz Trancho y Marisa López Diz; l’alcalde de Cabranes, Gerardo Fabián Llavona, y Alonso Zamora, fíu de la escritora María Josefa Canellada, reuniose na Casa de Cultura de Cabranes baxo la presidencia de la directora xeneral de Política Llingüística, Ana María Fueyo, y, según consta nel acta, decidió por unanimidá conceder el premiu a la obra Cápsules de tiempu “pola calidá del rexistru llingüísticu y el dominiu d’un estilu narrativu autorreferencial col que se desarrolla una historia unitaria, pensada n’asturianu y de gran capacidá didáctica”.

Carlos González Espina, llicenciáu en Lliteratura y bibliotecariu, trabaya anguaño na Fundación de Cultura del Ayuntamientu de Xixón y ye autor d’un bon númberu d’artículos y reseñes en revistes especializaes. Tamién tien publicao los llibros El Café Gijón (2001) y La Comedia Gijonesa (2001). Fue amás fundador, xunto con Marina Lobo, de Llibros del Pexe, una de les primeres editoriales de llibros n’asturianu. Nella, centróse de manera especial na traducción a esta llingua d’obres de lliteratura infantil y xuvenil, anque tamién firmó títulos como El curiosu alcuentru de don Quixote y la Princesa del Arbeyu (2005). El so últimu trabayu pal públicu infantil ye Falar ensin parar (2014), publicáu pola editorial Impronta.

A la convocatoria d’esti premiu, que llega con esta a la so sétima edición, podíen presentase obres de lliteratura infantil o xuvenil, con independencia de que se tratare de noveles, compilaciones de cuentos, obres de teatru o poemarios, siempre que fueren inéditos y tuvieren una estensión mínima de 250 versos, nel casu de los poemes, y de 30 páxinas a doble espaciu nel restu de los xéneros.