CincoxCinco= Hector Pérez Iglesias

Hector Pérez Iglesias (Arlós, Llanera, 1978) ta considerau pola critica como una de las voces más importantes de la lliteratura asturiana. Llicenciáu n’Historia y bibliotecariu en Llanera. Después d’asoleyar el llibru Las tardes baldias en castellanu (2004; Premiu Asturias Joven 2003), empezó a publicar násturianu, saliendo Prisión de náufragu (2006), L’amarga cazumbre (2008; Premiu Nené Losada Rico 2006), Como crecieres tu (2008; Premiu Teodoro Cuesta 2007), Desinencies (2009), Lo peor del bon tiempu (2010; Premiu Fernán-Coronas 2009). Tamién algamó los premios Elvira Castañón 2009 pola obra Aquella xente nunca sabia aú llevaben les carreteres xunta les que vivien (2011) y el Llorienzu Novo Mier de l’Academia de la Llingua Asturiana 2011 pola obra La mano vacia (2012)

1. Proponga un menú lliterariu: entrada, platu principal y postre.

D’entrante poesía, una antoloxía pa que seya variáu’l picotéu, por exemplu la reciente Subir al origen. Antología comentada de poesía occidental no hispánica (1800-1941), de José María Castrillón. Pa platu principal una bona novela como Cien años de Soledad, y envede postre paso directamente al café o copa de depués, sentáu nun sofá xunta una chimenea degustando a sorbiatos cuentos fantásticos y de terror d’autores clásicos como Poe, Sheridan le Fanu, M. R. James o Lovecraft.

2. ¿Cuál foi l’últimu llibru que sacó n’empréstamu d’una biblioteca? 

Orígenes: Cómo la historia de la Tierra determina la historia de la humanidad, de Lewis Dartnell. Un estudiu interesante onde se fala de cómo la influencia de los procesos xeolóxicos y naturales pudo determinar munchos de los aspeutos de la historia de la evolución humana y ciertes característiques concretes de delles civilizaciones. Una obra na llinia de títulos d’autores como Jared Diamond o Peter Watson, que nos fala del pasáu pero ensin quitar el güeyu a procesos mui actuales que pueden determinar el futuru.

3. ¿Qué escena lliteraria-y vien nesti momentu a la mente?

Quiciás pola cercanía de la festividá de Tolos Santos, l’entierru laicu de Santos Barinaga en La Regenta.

4. ¿Namoróse de dalgún personaxe lliterariu?

Non, yo creo que’l namoramientu (l’afeutu en xeneral) nun pue nacer de lo meramente virtual.

5. Suxera una tríada de poetes.

Por citar solo tres de los que d’una u otra manera m’influyeron nos entamos y momentos concretos a ampliar la mio visión de toles posibilidaes que pue ufrir la poesía y la llingua nel actu comunicativu que ye la lliteratura podría mencionar por exemplu a Antonio Machado,  José Ángel Valente y Xandru Fernández.

6. ¿Cuála foi la (o les) Biblioteca de la so vida?

Les biblioteques de la mio vida nun puen ser otres que les de Llanera, nes que trabayo  fai más de 13 años 

La primera la del mio colexu, en Villalegre (Avilés), recuerdo la emoción d’esos recreos nos que subía corriendo al tercer pisu onde taba’l cuartín qu’entós yera biblioteca pa restolar  ente les estanteríes. Pero  sobremanera les biblioteques de la mio vida nun puen ser otres que les de Llanera, nes que trabayo  fai más de 13 años.

7. ¿Con qué llibru espertaría l’amor a la llectura nun adolescente?

Nel mio casu unu de los primeros llibros que me fizo vivir la so historia foi El aula voladora, d’Erich Kästner. Pa los adolescentes d’hoi, pola experiencia na biblioteca veo que’l mundu de Harry Potter, más de 20 años depués de la so publicación, sigue siendo  una puerta al pasu de les llectures esporádiques infantiles a les llectures  con más posu de la adolescencia.

8. Cite trés novelistes pa siguir por cualquier llector.

Amplío lo de novelistes a narradores en xeneral; por citar tres actuales: Emmanuel Carrère, Lorrie Moore y Chus Fernández.

9. Proponga una midida a favor de la difusión de la llectura.

 Una midida a favor de la difusión de la llectura: Una mayor presencia de la lliteratura nos medios de comunicación xeneralistes  (poniéndome esperpénticu, un programa tipu Gran Hermanu pero encerraos nuna biblioteca)

Una mayor presencia de la lliteratura nos medios de comunicación xeneralistes  (poniéndome esperpénticu, un programa tipu Gran Hermanu pero encerraos nuna biblioteca).

10. ¿Quién son los sos compositores o músicos favoritos?

The Beatles, Jimmy Hendrix, Pixies, Yann Tiersen,  Debussy , Bach…. y munchos autores anónimos de música popular.

11. ¿Dalguna llectura marcó especialmente la so vida?

El señor de los anillos de J.R.R. Tolkien. Pa mi foi’l big bang del espertar de la mio imaxinación.

 12. ¿A qué autor rescataría del escaecimientu?

Préstenme muncho les antoloxíes de cuentos fantásticos del s. XIX y entamos del XX, y nestes antoloxíes hai delles autores muyeres qu’investigando un poco vese que fueron escritores mui prolífiques pero de les que qu’anguañu desgraciadamente hai mui poco espublizáu, nomes como Margaret Oliphant, Vernon Lee, Clemence Housman, Mary Eleanor Wilkins Freeman, Dinah Craik…

13. De xuru que podría aconseyanos la visión de polo menos trés películes.

Hai munches que podría ver en bucle una y otra vez, o que si al facer zapping  les topara yá empezaes pondríame a veles hasta’l final escaeciéndome  de lo que taba viendo enantes; por citar tres: Matar a un ruiseñor, Plácido, El viaje de Chihiro. Y por añadir alguna más reciente y menos conocida, A ghost story, de David Lowery.

14. ¿Qué poema interpreta los sos sentimientos?

Podría identificame con munchos de los poemes del llibru Casería de José Luis Rendueles.

15. ¿Cómo ve’l panorama editorial asturianu?

La llectura ye una fuerza cosmolóxica estraña y poderosa: igual que nel universu hai enerxíes que fain que s’espanda desbordando les sos própies llendes, la llectura fai que l’espaciu-tiempu qu’ocupa un cerebru finitu s’espanda enriqueciéndonos con perspeutives y dimensiones maravilloses 

En relación al pesu demográficu y económicu que tien Asturies nel total estatal, paezme que se fain coses mui interesantes y heroiques.

16. ¿A qué sitiu salíu de la imaxinación d’un autor-y prestaría treslladase?

Prestaríame muncho poder caleyar per La Comarca, y qu’al final del día un hobbit m’invitara a cenar al so smial.

17. Los sos artistes más almiraos son… (referío a pintores, escultores, fotógrafos, arquitectos… etc.)

De los artistes lo que más almiro ye la capacidá de, partiendo d’un conocimientu fondu de la tradición , arriesgase a dar un pasín más y abrir caminos nuevos, lo que fizo xente por exemplu como Miguel Ángel, Goya o Beethoven, por poner solo 3 exemplos  pioneros.

18. L’últimu llibru que mercó foi…

Enciclopedia Yokai, de Shigueru Mizuki

19. Pue l’e-book reemplazar el formatu clásicu?

Polo menos nes próximes dos xeneraciones  nun creo, convivirán (anque  cada vez con más prevalencia de lo dixital), pero depués yá nun pondría la mano nel fueu  de que sigan esistiendo los llibros tal como los conocemos,  porque los cambios soioteunolóxicos que vienen van facer que’l final d’esti sieglu seya mui diferente al mundu  del que somos herederos dende la invención de la imprenta.

20. ¿Podría dicinos cómo ordena la so biblioteca personal?

Primero por temática: historia, arte (música, pintura y cine principalmente), ciencies, temática asturiana y lliteratura; dientro d’esta última distingo narrativa y poesía, y  autores extranxeros, autores españoles y  llibros escritos n’asturianu. Por temática solo tengo nuna sección separtada los llibros de xenéru fantasticu. Lo ideal sedría depués ordenar too esto por autores y orden alfabéticu (deformación profesional como bibliotecariu) pero eso véolo de momentu más difícil por tolos llibros que tendría que volver mover…

21. ¿Ónde quedría vivir?

Asturies tien tolo que pueo pidir a un sitiu pa vivir, asina que tengo suerte de poder  siguir viviendo equí. Puestos a imaxinar, prestaríame conocer  los países nórdicos, creo que si les circunstancies fueren otres sedría un sitiu nel que podría vivir  bastante a gustu.

22.   ¿A qué persona viva almira?

La verdá ye que soi mui poco mitómanu en xeneral.

23. Al so paecer, ¿cuála ye la meyor obra lliteraria adaptada pol cine?

Siendo como son dos llinguaxes mui diferentes, quiciás me quedaría con El nombre de la rosa, porque la historia mantiense n’esencia idéntica nel llibru y na película, pero les maneres de contala son bastante diferentes, sabiendo en cada casu facer un usu  maxistral de los recursos de cada mediu.

24. ¿Qué ta lleendo actualmente?

Vida, la gran historia, de Juan Luis Arsuaga. Como nel casu del últimu llibru que saqué d’una biblioteca, otru ensayu de temática histórica y científica. La verdá ye que doime cuenta de que cuando estudiba la carrera d’Historia lleía muncha más lliteratura  qu’obres que se suponía debería lleer pola temática de los mios estudios, y ensin embargu agora ye completamente  al revés.

25. ¿Pa qué val la llectura?

La llectura ye una fuerza cosmolóxica estraña y poderosa: igual que nel universu hai enerxíes que fain que s’espanda desbordando les sos própies llendes, la llectura fai que l’espaciu-tiempu qu’ocupa un cerebru finitu s’espanda enriqueciéndonos con perspeutives y dimensiones maravilloses.

 

Dende tan lloñe

Héctor Pérez Iglesias

Saltadera

64 páxs.

///

Obra mayor na poesía d’Hector Pérez Iglesias, Dende tan lloñe ye un llibru abigarráu y riterativu, vibrante y sentenciosu, herméticu y paradóxicu. Nél la construcción pasional avanza y retrocede a semeyanza de les foles del mar, con fórmules repetitives nes que l’irraionalismu se convierte en protagonista, faciendo convivir lo abstracto y lo sensorial. Sorprendente y únicu, l’autor constrúi cada poema acarretando pa él una lóxica del discursu rota por ecuaciones del llinguaxe novedoses y lúcides. Busca armar un artefaxtu poéticu nel que la vehemencia imaxinativa y la desolación creadora s’ocupen de dar cuenta de la conmoción existencial.

 

(29 de ochobre de 2019)

 

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias