Cincoxcinco= Pablo Texón Castañón | Biblioasturias
Cincoxcinco= Pablo Texón Castañón

 

Pablo Texón Castañón (Felechosa, 1977), profesor d’Asturianu y de Llingua Castellana y Lliteratura, ye colaborador habitual en distintes publicaciones (El ComercioLa Nueva España, Les NoticiesEl SúmmumEventualLliteratura, Campo de los Patos, etc.). Editó’l poemariu Toles siendes (Premiu Nené Losada Rico) en 2005, el volume de narrativa Catedral (2006), el llibru de poesía La culpa y la lluz (ganador del Premiu Teodoro Cuesta) en 2007 y Singuralidá, tamién de narrativa, en 2011. Esi mesmu añu asoleya L’alma robada, textos en prosa poética basaos en semeyes de los fotógrafos Pablo Lorenzana y Mario Rojas. Fexo la versión asturiana de Xulia (2007), d’August Strindberg, pa Teatro Margen, y publicó en 2013 Un corte de pelo, selección poética de Raymond Carver. El últimu llibru de Pablo Texón, Media vida (Saltadera, 2017) xunta nun volume la so producción poética.

1. Proponga un menú lliterariu: entrada, platu principal y postre.

Garcilaso de la Vega, Emily Dickinson y Álvaro Cunqueiro.

2. ¿Cuál foi l’últimu llibru que sacó n’empréstamu d’una biblioteca?

Afortunadamente, va munchos años que me pueo permitir comprar los llibros que quiero lleer, conque lo último que saqué d’una biblioteca tuvo que ser daqué rellacionao col llabor de la investigación y non de llectura placentera.

3. ¿Qué escena lliteraria-y vien nesti momentu a la mente?

El final Las uvas de la ira creo que ye difícilmente superable.

4. ¿Namoróse de dalgún personaxe lliterariu?

De munchos, por supuesto. Voi recordar, por siguir con Steinbeck, a Lee, d’Al este del Edén. Ye un personaxe relevante, pero secundariu: tanto, que nun apaez na adaptación cinematográfica d’Elia Kazan.

5. Suxera una tríada de poetes.

Federico García Lorca, Sylvia Plath y Lourdes Álvarez.

6. ¿Cuála foi la (o les) Biblioteca de la so vida?

Munches. La primera foi la de la escuela: diba nos recreos y quedaba ellí lleendo. Tardé años n’atreveme a sacalos n’empréstamu porque tenía mieu de que se rieran de los mios apellíos y fixeran rimes con “Ramón” o coses asina. Recuerdo una colección de poesía “para niños” (Lorca para niños, León Felipe para niños, etc.) que lleí con devoción.

En 1988 lleváronnos de visita a la bilioteca de Santolaya (Morcín) y fíxime sociu. Recuerdo que saqué l’últimu premiu Planeta (Filomeno a mi pesar, de Torrente Ballester) pa que lu lleera mio padre y ún de Los tres investigadores pa mi. Naquel viaxe yera compañera mía Noelia Pereira, actual responsable d’esa biblioteca.

Nos años del institutu fíxime adictu a la Biblioteca de La Granxa, nel Campu San Francisco, que yera, en teoría, una biblioteca infantil, pero tenía una montonera de llibros p’adultos absolutamente maraviyosos y cuasi ensin estrenar.

Depués, frecuenté muncho la Biblioteca del Fontán, onde, amás de munchísimos llibros, saqué infinidá de discos (siempre me pregunté quién sería’l responsable de la espectacular discoteca que teníen).

La última biblioteca que quiero mencionar ye la de Edificiu Históricu de la Universidá d’Uviéu porque nella estudié gran parte de les oposiciones que saqué en 2006.

7. ¿Con qué llibru espertaría l’amor a la llectura nun adolescente?

 Una bona midida a favor de la difusion de la llectura diba ser dotar de más fondos a les biblioteques públiques

Rebeldes, de Susan Hinton, Deseo de ser punk, de Belén Gopegui y El guardián entre el centeno, de Salinger.

8. Cite trés novelistes pa siguir por cualquier llector.

Michael Chabon, Dave Eggers y Xandru Fernández.

9. Proponga una midida a favor de la difusión de la llectura.

Nun soi apocalípticu nesi sentíu y creo que se llee muncho anguaño. Y nun me refiero a lleer whatsapps, sinón llibros (que nos puen gustar más o menos, pero son llibros). Una bona midida diba ser dotar de más fondos a les biblioteques públiques.

10. ¿Quién son los sos compositores o músicos favoritos?

Bob Dylan, Miles Davies, Camarón, Beatles, Cohen, Bowie, Charlie Parker, Satie, Bach, Chopin, Stravinsky, Ilegales, Los Locos, Manta Ray, Llan de Cubel…

11. ¿Dalguna llectura marcó especialmente la so vida?

La llectura temprana de La forja de un rebelde, d’Arturo Barea (branu del 91) marcó la mio entrada a una llectura más adulta y consciente.

12. ¿A qué autor rescataría del escaecimientu?

Rescataría del escaecimientu a Fernán Coronas, el Padre Galo

Fernán Coronas, el Padre Galo.

13. De xuru que podría aconseyanos la visión de polo menos trés películes.

Ciudadano Kane, El Padrino y El espíritu de la colmena.

14. ¿Qué poema interpreta los sos sentimientos?

Por dicir ún, “Donde habite el olvido”, de Luis Cernuda.

15. ¿Cómo ve’l panorama editorial asturianu?

Creo que s’edita bastante bien n’Asturies. Los problemes apaecen na distribución y na promoción, que ye una cuestión medio editorial medio non.

16. ¿A qué sitiu salíu de la imaxinación d’un autor-y prestaría treslladase?

Prestábame dir a Cypress Avenue, quier dicise, al interior del discu Astral weeks, de Van Morrison.

17. Los sos artistes más almiraos son… (referío a pintores, escultores, fotógrafos, arquitectos… etc.)

La llectura  nun val pa nada, si siguimos los valores del pensamientu únicu imperante. Tolo importante de la vida (o, al menos, lo qu’a mi m’importa) nun val pa nada na lóxica mercantilista que nos arrodia. L’arte ye placer, ¿qué más quies?

Rothko, Klee, Pollock, Goya, Aurelio Suárez, Velázquez, Veermer, Man Ray…

18. L’últimu llibru que mercó foi…

La uruguaya, de Pedro Mairal y Difícil, de Xurde Fernández.

19. ¿Pue l’e-book reemplazar el formatu clásicu?

Fui de los primeros en comprar un Kindle y foi una gran idea. Sigo prefiriendo’l llibru en papel, pero hai situaciones nes que tienes qu’allixerar pesu y el llibru electrónicu ye la cuenta. Lo importante ye que les idees lleguen al cerebru del llector, la canal nun m’importa tanto. Prestaríame acabar col mitu culturalista na mio vida, pero ye difícil. Aspiro a ser como mio tíu que, en lleendo un llibru, regálalu. La falta d’espaciu en casa va obligame a ello.

20. ¿Podría dicinos cómo ordena la so biblioteca personal?

Tien cuatro escenarios: mio casa, el trasteru de mio casa, la casa de mios padres y el trasteru de casa de mios padres. Que tea nun sitiu o otru ye una cuestión cronolóxica o xerárquica, depende. Nos trasteros, los llibros tán dividíos per idioma y per valoración suxetiva mía. En casa, per xéneros y, dientro de los xéneros, per idioma.

21. ¿Ónde quedría vivir?

Nun voi usar el condicional: quiero vivir n’Asturies, concretamente na ciudá, calle, portal, pisu y puerta nos que vivo.

22. ¿A qué persona viva almira?

Actualmente a quien más miro y almiro ye a la mio fía Lena, que tien ocho meses y ella sola ye l’universu enteru.

23. Al so paecer, ¿cuála ye la meyor obra lliteraria adaptada pol cine?

El corazón de las tinieblas - Apocalypse Now.

24. ¿Qué ta lleendo actualmente?

Toi relleendo a Ishiguro. Tamién lleo a Bruner, sobre sicoloxía cognitiva.

25. ¿Pa qué val la llectura?

Pa nada, si siguimos los valores del pensamientu únicu imperante. Tolo importante de la vida (o, al menos, lo qu’a mi m’importa) nun val pa nada na lóxica mercantilista que nos arrodia. L’arte ye placer, ¿qué más quies?

 

 

Media vida: poemes y cantares

Pablo Texón

Saltadera

197 páxs.

///

Si en dalgo ta d’alcuerdu la crítica ye na importancia capital que tien la obra de Pablo Texón na lliteratura asturiana: en resume, talentu y compromisu. La so poesía, desolada, mándase d’un discursu figurativista nel qu’inxerta, con personalidá propia, detalles d’irracionalismu; esa obra, existencialista, entiende la vida como desposeimientu, pero tamién como celebración.

Agora ye’l momentu de xuntar nun volume la so producción poética: los llibros editaos, los poemes inéditos, los cantares que foi perfaciendo pa diversos grupos musicales de la escena asturiana, les traducciones de Carver y un precisu y bien interesante apéndiz sobre la concepción poética de Wittgenstein. En xunto, Media vida resulta una obra na que, a pesar de la variedá de llinguaxes usaos nella, rescampla la coherencia d’una mesma voz.

 

Semeya de Pablo Texón: Eduardo Carruébano

(5 de febreru de 2018)

 

 

 

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias