Cincoxcinco= Raquel F. Menéndez

 

Raquel F. Menéndez (Vallouta, Salas, 1993) ye graduada en Llingua Española y la so Lliteratura pela Universidá d’Uviéu. Cola so obra en castellán ganó nel añu 2013 el III Concursu Lliterariu de la universidá asturiana col llibru Libélula (2013) y participa nes antoloxíes Siete mundos (2015) y Poesía, alma del mundo (2014). Los sos poemes n’asturianu tán espublizaos en revistes como Formientu y Lliteratura. Nel añu 2016 ganó’l Premiu Nené Losada Rico con El llibru póstumu de Sherezade. La Tertulia Malory, de L’Entregu, escoyó como meyor llibru n’asturianu de tolos que s’editaron nel 2017 el poemariu El llibru póstumu de Sherezade.

1. Proponga un menú lliterariu: entrada, platu principal y postre.

De primeru, y pa entrar n’escena, India o cualquier otru poemariu/ensayu de Chantal Maillard, de segundu Los líquidos íntimos d’Olga Novo y, de postre, los últimos ensayos de Siri Husvedt, traducíos al español en La mujer que mira a los hombres que miran a las mujeres (Seix Barral).

2. ¿Cuál foi l’últimu llibru que sacó n’empréstamu d’una biblioteca?

Utilizo constantemente les biblioteques publiques d’Asturies, pero sobre too, la biblioteca de la Universidá d’Uviéu, y agora, la de la Universidá d’Utrecht, onde toi d’estancia d’investigación. L’últimu llibru que saqué d’una biblioteca pública d’Asturies foi Solenoide de Mircea Cărtărescu.

3. ¿Qué escena lliteraria-y vien nesti momentu a la mente?

Por tar trabayándola colos estudiantes d’español d’Utrecht nes últimes selmanes, la escena qu’abre Nada de Carmen Laforet, una novela imprescindible na lliteratura española de posguerra. Nes primeres páxines, Andrea, una moza que llega a Barcelona pa estudiar na universidá, rexistra les primeres impresiones de la ciudá que va facela crecer y, sobre too, va convertila nuna auténtica flâneuse.

4. ¿Namoróse de dalgún personaxe lliterariu?

Asumo cierto distanciamientu a la hora de lleer novela, quiciabes ye un defectu profesional, y, per otra parte, los amores na lliteratura son tan efímeros que nun m’alcuerdo de nengún.

5. Suxera una tríada de poetes.

Inger Christensen, María-Mercè Marçal y Lourdes Álvarez.

6. ¿Cuála foi la (o les) Biblioteca de la so vida?

La primera d’elles foi la biblioteca de Salas, onde tengo memoria del día nel que fui, con mio pa, a que me fixeran el carné de la biblioteca. Depués, diba con frecuencia a la Bances de Candamo d’Avilés, que ye de les que meyores fondos tien n’Asturies. N’usu, la que gana tien que ser la biblioteca del Campus del Milán de la Universidá d’Uviéu. 

La primera de les biblioteques de la mio vida foi la biblioteca de Salas, onde tengo memoria del día nel que fui, con mio pa, a que me fixeran el carné de la biblioteca. Depués, diba con frecuencia a la Bances de Candamo d’Avilés, que ye de les que meyores fondos tien n’Asturies. N’usu, la que gana tien que ser la biblioteca del Campus del Milán de la Universidá d’Uviéu.

7. ¿Con qué llibru espertaría l’amor a la llectura nun adolescente?

Otra vez, Nada, de Carmen Laforet, polo que tien de bildungsroman.

8. Cite trés novelistes pa siguir por cualquier llector.

Joan Didion, Samanta Schweblin y Marta Sanz.  

9. Proponga una midida a favor de la difusión de la llectura.

Pa la llectura, favorecer a los y les llectores. Que quienes somos llectores n’Asturies podamos topar actividades de calidá vinculaes a la lliteratura y que dispongamos nes biblioteques publiques de fondos que lleer.

10. ¿Quién son los sos compositores o músicos favoritos?

El mio gustu musical ye eclécticu. Ente les mios references de siempre ta la música de Pink Floyd. Tengo munches dificultaes pa dicir lo meyor de, pero prestáronme muncho los últimos discos de Laura Marling, José González y Flo Morrissey. Tamién, per otru llau, lo que ta faciendo Stromae pola música más mainstream.

11. ¿Dalguna llectura marcó especialmente la so vida?

Ye tópicu decilo, pero probablemente Poeta en Nueva York de Lorca fora una d’elles. Dalgunos poemes en asturianu de Lourdes Álvarez, Berta Piñán y Antón García tamién me impactaron por razomnes mui distintes. Nos últimos años marcome tamién el descubrimientu de la danesa Inger Christensen y de la irlandesa Paula Meehan.

12. ¿A qué autor rescataría del escaecimientu?

A una de les autores que más trabayé y trabayo na mio trayectoria académica e investigadora: Ángela Figuera Aymerich.

Pa la difusión de la llectura, favorecer a los y les llectores. Que quienes somos llectores n’Asturies podamos topar actividades de calidá vinculaes a la lliteratura y que dispongamos nes biblioteques publiques de fondos que lleer.

13. De xuru que podría aconseyanos la visión de polo menos trés películes.

Ente les clásiques, siempre m’interesaron películes italianes como Roma, citta aperta, Ladrón de bicicletas y 8 e mezzo de Fellini. Ente les recientes, soi fan de La grande belleza de Paolo Sorrentino, que recupera muncho de les anteriores. Tamién m’interesó The Tree of Life de Terrence Malick. Y, como non, pa romper cola mirada masculina y patriarcal de les anteriores, cualquier película d’Agnés Vardá. La última, codirixida con JR, Visages Villages, ye imprescindible.

14. ¿Qué poema interpreta los sos sentimientos?

Depende del momentu.  “El fríu medró en min” de Lourdes Álvarez pue ser un bon exemplu:

“[…] Por eso ayer nun sabía desplicate

cómo foi creciendo’l fríu en mi,

cómo foi que quedé parada ente les fuentes

y esti presentimientu doloríu de les manes

que tienen como cierto’l que te pierden”.

15. ¿Cómo ve’l panorama editorial asturianu?

Les editoriales n’español tan al nivel de cualquier otra y les editoriales n’asturianu faen munchu si tenemos en cuenta les dificultaes de publicar nuna llingua minoritaria y minorizada. Quiciabes el mayor problema que tienen que solucionar les editoriales n’Asturies ye la distribución.

Les editoriales asturianes n’español tan al nivel de cualquier otra y les editoriales n’asturianu faen munchu si tenemos en cuenta les dificultaes de publicar nuna llingua minoritaria y minorizada. Quiciabes el mayor problema que tienen que solucionar les editoriales n’Asturies ye la distribución.

16. ¿A qué sitiu salíu de la imaxinación d’un autor-y prestaría treslladase?

Yá va siendo un tópicu, pero tener Pedro Páramo de llectura obligatoria pa la prueba d’accesu a la universidá punxo Comala na mio cabeza.

17. Los sos artistes más almiraos son… (referío a pintores, escultores, fotógrafos, arquitectos… etc.)

L’artista Louise Bourgeois, la cineasta Agnes Vardá, y fotógrafes como Cristina García Rodero y Vanessa Winship.

18. L’últimu llibru que mercó foi…

Por esto de tar fuera, los últimos llibros merquelos va casi dos meses na llibrería Cervantes d’Uviéu. El primer d’ellos foi La hermana menor de Mariana Henriquez (Anagrama), que ye una biografía de Silvina Ocampo. El segundu merquelo por esto de tar pasando unos meses n’Utrecht: titulase El ojo del observador. Johannes Vermeer, Antoni van Leeuwenhoek y la reinvención de la mirada de Laura J. Snyder (Acantilado).

19. ¿Pue l’e-book reemplazar el formatu clásicu?

Sí, pero mui a la llarga. Nun creo que lo veamos. Si l’ebook reemplaza al formatu clásicu nun tien por qué ser dalgo malu, a lo llargo de la historia van camudando les formes de lleer.

20. ¿Podría dicinos cómo ordena la so biblioteca personal?

Por llugares y por époques (más o menos). Anque l’abundancia va acabar por llamar al orde alfabéticu y xeográficu. Tolos mios llibros tan na mio casa de Vallouta (Salas).

21. ¿Ónde quedría vivir?

Gustaríame vivir nuna Asturies onde les biblioteques y la cultura fueren más importantes de lo que lo son. También nuna Asturies con un meyor sentíu de la xestión del patrimoniu (en cualesquier de les sos formes).

22. ¿A qué persona viva almira?

A munches, ente les que tan gran parte de les novelistes y poetes que toi acabante de mencionar. Tamién al profesoráu del máster y del programa de doctoráu de Xéneru y Diversidá de la Universidá d’Uviéu, pol rigor col que cada día s’enfrenten a la investigación y la docencia.

23. Al so paecer, ¿cuála ye la meyor obra lliteraria adaptada pol cine?

Aparte de Apocalypse Now, hai otres adaptaciones menos clásiques que tamién son casi hitos. Nel marcu español, la de Los santos inocentes de Delibes foi clave nun momento nel qu’España taba intentando recuperar la memoria escaecida. Fuera del marcu español, y más recientemente, una mui llograda ye The Virgin Suicides, l’adaptación de la novela de Jeffrey Eugenides que fixo Sofía Coppola nel añu 2000 y la d’ Atonement de Ian McEwan qu’adaptó Joe Wright en 2007.

24. ¿Qué ta lleendo actualmente?

La biografía de Silvina Ocampo que fixo Mariana Henríquez que comenté enriba.

25. ¿Pa qué val la llectura?

Eso siempre va depender de quien la llea.

 

El llibru póstumu de Sherezade

Raquel F. Ménendez

Impronta

62 páxs.

///

 

¿Cómo reformular la esperiencia de la tierra y del cuerpu frente a la falta? ¿Cómo facer un rellatu familiar cuando paez que ta condenáu a ser póstumu? Los poemes d’El llibru póstumu de Sherezade fáense estes entruges mentá traten de reconstruyir la identidá al traviés de la escritura.

 

 

 

 

 

 

 

(5 de ochobre de 2018)

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias