‘Crónica de la lluz y la solombra’, d’Antón García, Premiu Xosefa Xovellanos

La novela titulada Crónica de la lluz y la solombra fue la escoyida pol xuráu del Premiu Xosefa Xovellanos, dotáu con 3000 euros, como la ganadora de la XXXV edición. Presentada baxo l’alcuñu Escudiella, resultó ser obra del poeta, narrador, críticu lliterariu y editor Antón García, que yá consiguiere esti galardón n’otres dos ocasiones.

El xuráu encargáu de valorar les obres, presidíu pola directora xeneral de Política Llingüística, Ana María Fueyo, y compuestu polos escritores Pablo Rodríguez Medina, ganador de la edición anterior del galardón; Vanessa Gutiérrez, Roberto González-Quevedo y Paz Fonticiella, amás del técnicu en materia llingüística Xosé Miguel Suárez Fernández, destacó“l’habilidá pa narrar el sucesu central de la historia dende múltiples puntos de vista y la maestría nel usu de rexistros llingüísticos colos que s’algama un ritmu mui llográu”.

Antón García (Tuña, Tinéu, 1960) ye poeta, narrador y traductor, amás d’estudiosu de la lliteratura asturiana. Na so obra destaquen los títulos de narrativa El viaxe (1988) y Díes de muncho (1998), colos que yá ganó′l Premiu Xosefa Xovellanos nes ediciones sétima y decimoctava. Tamién se fizo col Premiu Teodoro Cuesta de Poesía (1995) y otros como’l de la Crítica o’l Fernández Lema. La so poesía completa apareció reunida nel volumen La mirada aliella (2007). L’autor, que tamién ye fundador de les editoriales Tsibros de Frou y Ediciones Trabe, dirixe anguaño la revista asturiana de cultura Campo de los Patos y la editorial Saltadera cola que de recién publicaba Les manes enceses Antoloxía (1948-2001) na que traduz al poeta portugués Eugénio de Andrade.

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias