Damián Barreiro faise col Premiu Máximo Fuertes Acevedo d’Ensayu

La vixésima edición del Premiu Máximo Fuertes Acevedo d’Ensayu, que convoca cada añu la Conseyería d’Educación, Cultura y Deporte con una dotación de 3.000 euros, fue nesta ocasión pal investigador Damián Barreiro Maceiras, pol estudiu tituláu  Caleya Sésamu: el papel de la televisión na tresmisión interxeneracional de la llingua.

El xuráu, presidíu pola directora xeneral de Política Llingüística, Ana María Fueyo, y compuestu polos escritores y investigadores Naciu Llope, Xosé Antón Suárez Puente y Luis Casteleiro Oliveros, escoyó por unanimidá esti testu, destacando “la solidez documental y la buena estructuración d’una obra qu’analiza les posibilidaes de l’animación infantil como instrumentu favorecedor de les llingües minoritaries, avanzando propuestes concretes nel ámbitu de la normalización social de la llingua asturiana”.

Damián Barreiro (A Estrada, Pontevedra, 1984) ye periodista. Tres formar parte de la plantiya del desaparecíu selmanariu Les Noticies, collaboró con otros medios de comunicación asturianos, como la Televisión Local de Xixón, el periódicu Diagonal Asturies o’l diariu La Nueva España, na estaya ‘Escolinos’. En 2013 ganó’l Premiu d’Ensayu Fierro Botas, convocáu pol Ayuntamientu de Xixón, cola obra L’espeyu onde miranos: televisiones de proximidá n’Europa Occidental y procesos de recuperación identitaria. Una temática, la de la función normalizadora pa les llingües minorizaes de les televisiones, na qu’afonda agora con esti trabayu nuevu que será publicáu nos próximos meses.