El Muséu del Pueblu d’Asturies edita’l ‘Cancioneru de la Gaita asturiana’

El Muséu del Pueblu d’Asturies ta acabante d’editar el Cancioneru de la gaita asturiana, rubricáu polos espertos Eugenio Otero Vega, Fonsu Fernández García y Gausón Fernande Gutierri. Una inmensa obra que supón el primer estudiu sistemáticu asoleyáu n’Asturias sobre la historia, los usos y el repertoriu musical de la gaita asturiana, averando esti instrumentu tan arraigáu na nuestra cultura al públicu xeneral.

Fue Fermín Canella, fundador del grupu La Quintana, el que primero señaló la necesidá d’afondar nel conocimientu de la gaita asturiana. Ello fue nel añu 1884, cuando, nel so modelu d’encuesta pa la recolección de datos sobre’l folklore y les costumes d’Asturies, metió la gaita ente les materies qu’habíen ser estudiaes, y asina-y lo comunicó a Antonio Machado y Álvarez, fundador d’El Folklore Español, y lo publicó esi mesmu añu nos Cartafueyos d’Asturies. Quería con aquel pasu indicar la urxencia de dalgo que yá se vía como una carencia a subsanar, pero, sin embargu, hubo pasar un sieglu p’atopar la primer respuesta. D’esta manera, en 1984 Xuacu Amieva Celorio publicaba Método de gaita, una obra que facía accesible per primer vez al públicu xeneral un saber qu’hasta la fecha taba reserváu a los propios gaiteros.

Dende entós salieron delles obres asomeyaes, firmaes por autores como’l propiu Amieva, Flavio Rodríguez Benito, José Ángel Hevia y Balbino Menéndez, ente otros. Tamién aparecieron melodíes tradicionales de gaita n’obres non específicamente centraes nesti instrumentu tan venceyáu a la idiosincrasia de los asturianos, como ye’l casu de dos escelentes monográficos sobre la jota y la muñeira n’Asturias publicaos por L’Andecha Folclor d’Uviéu, complementaos con valioses selecciones de partitures. Amás, la revista Asturies, memoria encesa d’un país, editada pola Fundación Belenos d’Uviéu, incluyó dellos artículos qu’afondaron n’estremaos aspectos del universu de la gaita y que añeden interesantes datos biográficos sobre gaiteros de dalgunos conceyos d’Asturies. Sicasí, pesie a la variedá d’enfoques, munches d’aquelles obres taben destinaes a la enseñanza, ocupándose sobre too d’aspectos técnicos, y, anque aportaben selecciones musicales estenses, el repertoriu de la gaita nuna fuere por sí mesmu oxetu d’un estudiu monográficu, como tampoco’l procesu históricu de la so formación.

D’ehí la importancia d’esta edición del Muséu del Pueblu d’Asturies que non solo axunta y ordena materiales pa ponelos a disposición del públicu interesáu, sía escolar o aventayáu na interpretación d’esti instrumentu. La so intención ye amás afitar la gaita na historia d’Asturies y poner de relieve cuál fue’l so significáu na sociedá tradicional, el so protagonismu na parte relixosa y profana de la fiesta y la so presencia nos momentos más importantes de la vida de los asturianos. Completísima, la obra ta dividia en dos tomos. El primeru, con abundantes ilustraciones, recuerre la hestoria del instrumentu, el so usu na sociedá tradicional y les innovaciones que tuvo nes últimes décades. El segundu tomu, pela so parte, inclúi 334 partitures.

Na sociedá tradicional asturiana, la gaita fue l’instrumentu encargáu de poner música a la vida comunitaria, acompañando’l cantu, el baille y les procesiones cíviques y relixoses. D’orixe medieval, empieza a documentase en monumentos relixosos, códices y escritos alministrativos dende’l sieglu XIII, manteniéndose hasta los nuestros díes nuna tradición viva que se puede rastriar al traviés de les diferentes dómines. Por eso, y como gran novedá, el primer tomu del Cancioneru de la Gaita revisa eses fontes conservaes y, fitándose nelles, propón una historia d’esti instrumentu, na que los protagonistes son los propios gaiteros, los artesanos constructores y la xente asturiana que, pesie a tolos cambios sociales y influencies estétiques y culturales, conservó la gaita xeneración tres xeneración, llegando a da-y un valor patrimonial y a convertila en símbolu musical del país. Un rigurosu estudiu que se completa con una amplia selección fotográfica procedente na so mayoría de la Fototeca del Muséu del Pueblu d’Asturies, ún de los servicios más importantes col que cuenta’l muséu anguaño, con un fondu integráu por polo menos un millón d’imáxenes.

Pela so parte, el tomu II axunta una selección de partirures que compriende 334 melodíes tradicionalmente tocaes con esti instrumentu, y que foron ordenaes pola so función na fiesta. De manera que s’estructura clasificando les pieces de marcha, les canciones, les dances y los bailles, y el repertoriu relixosu qu’inclúi la trescripción d’una misa de gaita completa. Pero, amás, nun escaez tampoco’l fenómenu de renovación del repertoriu de gaita que se dio dende los años ochenta del sieglu pasáu, momentu nel que, gracies al perfeccionamientu técnicu del punteru, munches melodíes procedentes d’otros instrumentos tradicionales y inclusive de la música vocal y coral pasaron a incorporase al repertoriu habitual de la gaita.

Un magníficu trabayu, un esfuerzu editorial importante, interesante pa tou tipu de públicos, que’l Muséu del Pueblu d’Asturies pon na cai col aval del prestixu y rigurosu llabor de los sos autores: Eugenio Otero Vega, maestru gaiteru; Fonsu Fernández García, director del Muséu de la Gaita de Xixón; y Gausón Fernande Gutierri, investigador de la herencia cultural asturiana.

(13 de febrero de 2012)