Enrique Carballeira & Asturtoons: “Los adultos seríen muncho más felices si s’allegasen a la lliteratura infantil” | Biblioasturias
Enrique Carballeira & Asturtoons: “Los adultos seríen muncho más felices si s’allegasen a la lliteratura infantil”

Defende Enrique Carballeira (L’Infiestu, 1970), responsable de la Editorial Asturtoons, que si los adultos s’averaren más a la lliteratura infantil y xuvenil diben a ser muncho más felices. Y nun ta faltu de razón. Preba d’ello ye l’éxitu que tien ente los mayores, por exemplu, el cine d’animación con hestories en principiu dirixíes al públicu más pequeñu.

Ilustrador, narrador y editor, ponía en marcha a finales del añu 2005 esti proyectu especializáu en llibros infantiles en llingua asturiana, estrenándose con trés obres: Los viaxes de Kiki, d’Ana Belén Iglesias, Menudu elementu, de Miguel Rojo, y Ana y los animales, del propiu Carballeira que, a la vez, ocúpase de la parte gráfica de toles obres. D’entós p’acó son munchos los títulos que foron conformando’l ricu catálogu d’esti estudiu nacíu en Piloña, qu’amás dio’l pasu tempranamente a la venta de llibros en formatu ellectrónicu y a l’animación. Por eso, aprovechando la salida del volume El dia de los charcos, aprovechamos pa falar col so autor, mesmo de la lliteratura infantil que de les posibilidaes qu’ésta ufierta a la llingua asturiana na formación de los falantes más nuevos.

 

Acabes de publicar El día de los charcos. Preséntanos al personaxe del axente Stradivanski y la so hestoria.

Bono, la verdá ye que l’axente Stradivanski vien a ser como’l malu de la historia, anque ye cierto que ye un malu a medies, y al final tampoco-y salen mal les coses. Los protagonistes verdaderos nun tienen un nome concretu, porque vienen a ser tolos neños, en xeneral. Ye una historia que xira alrodiu d’esi espíritu rebelde, xuguetón, chanciosu y un pocu anárquicu de la reciella.

Hai años yá que te lleves dedicando a la llitaratura infantil. ¿Esto vien marcao pola to profesión tamién d’ilustrador, o ye un públicu y un tipu de lliteratura que t’interesa especialmente?

Yo creo que sí que marca bastante’l que de siempre me gustara dibuxar y ilustrar histories. Pero tamién ye una lliteratura que m’interesa poles tonelaes d’imaxinación qu’atopamos dientro d’estes páxines. Creo qu’hai muncha llibertá, munchu humor, desenfadu… Les películes que s’empobinen a los neños davezu son mui vistes tamién polos mayores, pero esto nun pasa cuasi nunca cola lliteratura infantil. De xuru que los adultos seríen muncho más felices si s’allegasen a estos llibros. Habría que perder la vergoña.

¿Qué particularidaes diríes que tien la ilustración de cara a un públicu infantil?

Hai opiniones pa too, y si yo tengo que dar la mía, diría que tienen que ser ilustraciones divertíes, orixinales, imaxinatives, con un bon nivel de color. Por supuestu qu’un estilu propiu, orixinal d’un dibuxante siempre s’agradez. Lo que pasa ye que tamién hai una corriente que, buscando la mayor orixinalidá, apuesta por un tipu d’ilustración feista, curtia de color, oscura… Hai llibros pa neños con unes ilustraciones que, de verdá, dan auténticu mieu y hasta mal rollu. Yo esto nun lo acabo d’entender. Hai editores que talmente paez que nun piensen nos rapazos a la hora de diseñar un llibru. En fin, esto ye lo que creo según la mio esperiencia y tratu con munchos neños nestos últimos años.

Hai llibros pa neños con unes ilustraciones que, de verdá, dan auténticu mieu y hasta mal rollu. Yo esto nun lo acabo d’entender”

¿Siénteste más cómodu que faciendo ilustraciones p’adultos?

Como dixi enantes, creo que la llínia ente lliteratura o ilustración pa neños y p’adultos en realidá nun esiste. Digamos que me presta más dibuxar una bruxa, un dragón, un estraterrestre, una biesca o un castiellu, qu’un oficinista, un coche, un buzón de correos, una carretera o un edificiu de pisos. ¡Y a quién non!

¿Faise mui complexo ilustrar sobre una hestoria ayena y ciarrada? ¿Faislo con total llibertá o a comuña colos autores?

Sí, normalmente hai bastante llibertá a la hora d’ilustrar una historia pa otru escritor. Por supuestu si l’autor quier facer dalguna propuesta o dar idees, trato de siguir eses indicaciones, siempre que s’afiten bien a la historia. Pero en munchos casos, hai una llibertá total. En xeneral nun me resulta difícil, ye prestoso.

Hai años que creasti y mantienes almirablemente la editorial Asturtoons. ¿Cómo nació esti proyectu? ¿De la necesidá de qu’hubiere una editorial n’Asturies qu’apostare y cuidare les ediciones de llibros ilustraos dedicaos al públicu más pequeñu?

Sí, foi una apuesta mía y de la mio hermana, dientro d’otru proyeutu un pocu más amplíu de diseñu y marketing. Pero bono, al final los tiempos vinieron como vinieron y lo que trato ye que, pesie a los problemes que toos tamos pasando, tolos años haya dalgún títulu en llingua asturiana que pueda llegar a la comunidá escolar y a la sociedá en xeneral. Y sí, como apuntes, nació con esa idega de facer llibros ilustraos nun momentu nel que nos paeció qu’había sitiu pa ello nel mercáu. Y sobre too col enfotu de que llegasen de verdá a los neños.

l’unicu oxetivu económicu d’Asturtoons ye poder siguir publicando histories”

¿Ye mui complexo mantener a día d’hoi una editorial d’estes característiques?

La fórmula ye cenciella: l’unicu oxetivu económicu d’Asturtoons ye poder siguir publicando histories. Nestos momentos creo que ye perdifícil buscar, a esti nivel, un beneficiu económicu colos llibros que publicamos. Tenemos otres ocupaciones profesionales que nos permiten destinar los curtios ingresos de les ventes a caltener dalgunes publicaciones añales. Por supuestu nestos momentos la llingua asturiana depende más que nunca de les subvenciones, pero éstes tamién tán baxo mínimos. En resumen: Asturtoons publica histories porque ye lo únicu que pretende facer. Y si la situación económica nun permite siguir publicando eses histories en papel, editaremos llibros en formatu electrónicu, que tienen unos gastos mínimos. Nun ye que refuguemos de tener una rentabilidá económica pero, perenriba d’ella, vamos siguir asoleyando novedaes que puedan llegar a los potenciales llectores.

Tamién tienes trabayao na animación. ¿Por esperimentación o realmente tienes ganes d’avanzar ensi sen?

En primer llugar sí ye verdá qu’hubo muncho d’esperimentación naquelles histories que fixe. Hubo un momentu nel que de verdá creyí que se podría facer un proyectu rentable col sofitu de los medios televisivos. Depués esos medios foron desapaeciendo y quedónos namás que la TPA. Hai años que tengo mandáu dalgún dvd con muestres. Yá perdí la esperanza de recibir rimpuesta. Queden dalgunes cosines nel canal d’Asturtoons en Youtube. Ye una pena, porque creo que, ensin llegar a facer animación total, la emisión na tele de cuentos en formatu audiovisual podría facer munchu pola llingua asturiana. Y a un preciu de risa…

Hai munchos autores, non solo llectores, que consideren que la lliteratura infantil ye l’apuesta de futuru pa la llingua asturiana. ¿Cuála ye la to esperiencia al respective?

Sí, claro. En realidá si nun hai renovación na cantera de llectores n’asturianu creo que la llingua tará perdía del too. Y la cantera, la reciella, tien que tener materiales que puedan competir, polo menos mínimamente, con toos esos materiales que s’editen en castellanu.

si nun hai renovación na cantera de llectores n’asturianu creo que la llingua tará perdía del too”

¿Les escueles asturianes amuesen interés pola lliteratura asturiana pa da-yosla a conocer a los sos alumnos?

Depende munchu del profesoráu d’asturianu de cada centru. Hai casos pa tolos gustos. De toes formes, creo que son pocos los centros qu’apuesten por recomendar a los escolinos la llectura d’un llibru n’asturianu. Claro, lleguen les grandes editoriales nacionales y prometen, por exemplu, una pizarra dixital pal centru si recomienden ún de los sos llibros. Esti ye un casu real. Les editoriales asturianes nun podemos competir con esi nivel de “regalos”. Eso sí, hai dalgunos colexos que sí se mueyen y apuesten de verdá, polo menos de xemes en cuandu, pola llingua. Y ye d’agradecer.

¿Qué debilidaes y qué fortaleces ves na lliteratura infantil nesti momentu?

Debilidaes creo que toles que ta causando la crisis y la falta de perres nel bolsu de los posibles llectores. De verdá que nun soi a atopar más. Y creo que fortaleces hai munches: Bonos escritores, bonos ilustradores, imaxinación a calderaos, ganes… Diría tamién que’l llibru dixital, el seguimientu de la televisión per parte de los neños, los móviles, o les tabletes, tamién puen ser fortaleces y nuevos calces pa llanzar la lliteratura infantil. Hai que los saber aprovechar.

 

 

 

 

 

 

 

 

poco y a poco, Asturtoons tien yá un interesante y ampliu catálogu de llibros. ¿Hai un ideariu claru y acutáu de lo que queréis sacar, o táis dispuestos a abrivos a diferentes propuestes y rangos d’edá, en casu de que vos llegue una obra que vos abulte interesante?

Sí, tamos abiertos. Creo que lo principal ye atopar bones histories, que puedan resultar guapes pa los llectores. El principal llimite agora vien más del llau de la economía que de les idees.

Nel so momentu, Asturtoons fue de les primeres editoriales n’abrise al mercáu al traviés de la rede. ¿Ye rentable esi comerciu o aínda la xente nun ta familiarizada con ello?

La nuestra esperiencia ye más bien colos llibros electrónicos, que tán medrando munchu. N’otros paises el nivel de ventes ye impresionante. Equi n’España ta garrando velocidá de cruceru, anque hai menos apuesta pola lliteratura infantil que, por exemplu, poles noveles p’adultos, que se venden más. La ventaya de los ebooks ye que son baratos d’editar y tienes la oportunidá, en cuestión de minutos, de tar a la venta en tol mundu. El problema ye facese visible ente los “tropecientos y picu mil millones” d’obres que comparten l’escaparate contigo.

¿Cuáles son los próximos títulos que vamos ver de la editorial?

De momentu, acabamos de sacar dos nuevos estos díes, el que comentamos yá, El día de los charcos y ún de Xavier Frías, Mio ma ye un dragón coloráu. De momentu vamos centranos na promoción d’estos títulos hasta final d’añu y a partir d’ehí veremos. En formatu ebook tamién editamos un títulu estos díes, que ta disponible pa descargar llibremente dende la nuestra web. Títulase Un viaxe mui espacial. Espero que vos preste.

(18 de mayu de 2013)

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias