Enrique Carballeira, VI Premiu Alfonso Iglesias de Cómic

L’escritor y periodista Enrique Carballeira ye’l ganador de la sesta edición del Premiu Alfonso Iglesias de Cómic, que concede la Conseyería d’Educación, Cultura y Deporte, y que ta dotáu con 3.000 euros. Asina lo estimó’l xuráu encargáu de valorar les obres presentaes, del que formaben parte’l dibuxante Neto; l’escritor y guionista Chechu García; y el técnicu en materia llingüística Luis Casteleiro, que se reunió baxo la presidencia de la directora xeneral de Política Llingüística, Ana María Fueyo.

A esti galardón podíen presentase cómics d’estilu, tratamientu y tema llibres, escritos en llingua asturiana, y con una estensión mínima de cincuenta páxines, siempre que fueren inéditos y non premiaos n’otros concursos. Ente les obres presentaes, el xuráu decidió, por unanimidá, conceder el premiu al cómic L’arume de la tierra, del que destacó “la utilización de los recursos propios del llinguaxe del cómic, la calidá gráfica y el manexu de los tiempos narrativos al serviciu d’una historia con tresfondu actual”. L’autor, que resultó ser Enrique Carballeira, presentóse al concursu col seudónimu de Mozer.

Enrique Carballeira (Infiesto, 1970) ye periodista, escritor, diseñador y ilustrador. Colaborador habitual d’Onda Cero y del diariu El Comercio, tien escrito numberosos llibros pa públicu infantil, cómics y cuentos p’adultos. Nel ámbitu del humor gráficu, ye autor de la tira selmanal Les coses de Nardo y Quina, qu’aparez dende hai dos décades nos periódicos El Nora y El Fielato. Amás, nos últimos años punxo en marcha dellos proyectos editoriales, talleres d’escritura, ilustración y llingua asturiana, asina como estremaes iniciatives audiovisuales y d’animación.