Impronta presenta cinco llibros infantiles n’asturianu

El xueves que vien, día 6 de payares, a les 19:30 hores, el local social del Atenéu Obreru de Xixón (Cai Covadonga, 7 – 1º esquierda) va acoyer la presentación de cinco llibros infantiles en llingua asturiana publicaos de recién pola Editorial Impronta. La presentación va correr a cargu de los propios autores: Leonardo Borque (Bernardo Lodares), autor de Teba; Alfonso López Alfonso, autor de Valentín y el monte d’azucre; Carlos González Espina, autor de Falar ensin parar; y Irene Riera, autora de Queridu día y Hai que tomar midíes.

Les desgracies y necesidaes que trixo la guerra ente españoles pon el marcu a la hestoria de Teba, una perra que nun entendía del conflictu pero sí de fidelidá en tiempos d’escuridá y medrana. Una obra de la que son autores Bernardo Lodares y Carmen Fernández, y que cuenta coles ilustraciones de Marina Lobo, responsable de la editorial Impronta.

Alfonso López Alfonso ye autor de la obra Valentín y el monte d’azucre, ilustrada nesti casu por Claudia González Lobo.  Al protagonista d’esti cuentu encánta-y escuchar histories pero présta-y más contales, de manera que, pa convencer a la madre de que les coses que siempre anda inventando discúrreles él solu, escribe’l cuentu de Valentín y el monte d’azucre. “Cerca de casa de los mios guelos hai un monte que tengo muncha gana de xubilu. Ye tan blancu que delles veces abúltame que ta fechu d’azucre…”.

Mesmo Teba que Valentín y el monte d’azucre son ediciones que pertenecen a la colección Menudu cuentu, mentes que Queridu día y Hai que tomar midíes correspuenden a la estaya Bonos principios de la editorial. Ilustraos entrambos los dos por Lara González Cobo y firmaos por Irene Riera, el primeru tien como protagonista a una neña que sabe que “l’ánimu que se precisa pa facer frente al nuevu día ye’l mesmu que fai falta pa entamar una aventura”. A la del segundu, sicasí, lo que nun-y gusta ye la imprecisión con que falamos de munches coses, por eso ponse “a discurrir nueves maneres pa midir como se debe coses tan importantes como los besos, los abrazos, les esmoliciones, los disgustos, les allegríes…”.

L’últimu de los llibros que va presentar Impronta correspuende a la colección Fierabrás qu’hai un añu inauguraba l’escritor Francisco Álvarez Velasco y que nesta ocasión tien como autor a Carlos González Espina. Tituláu Falar ensin parar tamién cunta con una protagonista femenina a la que charrar présta-y más que nada y que se dedica a esperimentar col llinguaxe a base de xuntar palabres.