La mio hermana ye una mofeta | Biblioasturias
La mio hermana ye una mofeta

La mio hermana ye una mofeta

Berta Piñan / il. Francesca Assirelli

Pintar-Pintar

32 págs.

///

Dende que nació la so hermana supo que ¡yera una mofeta! Po la cabecina prieta y pelona… pero sobre too ¡pol golor! ¡El golor de les mofetes! Ya Luisi, la profe d’inglés, desplico-y que les mofetes tiren peos grandísimos que tienen un golor que se mete per tolos llaos y que tamién puen morder y esgatuñate. Por eso supo dende’l principiu que la so hermana yera una mofeta. Otra cosa que-y estrañaba yera que la xente que vinía a casa quería garrala y llamabénla “monada” y “ricura”. Cuando per primer vez ensin la mofeta salió con so mami de paséu pasarónlo perbien, como enantes, y entós preguntó-y si ella pensaba que la mofeta diba siguir en casa cuando volvieren… ¡ya entós armóse la gorda! Papi dixo-y que la so princesa yera solo ella pero que llama-i mofeta a la hermanina nun taba nada bien. Y como nun quería disgustalos, pela nueche acercose a la mofeta y esta empezó a facer espatuxos, a garrái el deu indiz, a rir…y entós pasó la cosa más estraordinaria del mundu: a la mofeta cambio-y la cara y convirtiose n’hermanina!

Esti album de Berta Piñan acercanos, cola sensibilidá de la que solo ella ye capaz, a una nena que siente como esa hermanina que llegó a casa, quitando-y tol protagonismu a ella,”la princesa”, solo puede face-y pensar en golores fétidos y n’animales empustes. Cuando comprueba qu’el so pensamientu causa malestar nos que la quieren y a los que quier, va poder averase a la guaja d’una forma menos predispuesta a la perceguera. Y ye entós cuando se produz un pequenu milagru, cuando afaya que la nena y ella tienen daqué en común… que se reconocen, que pueden compartir secretos ¡que son hermanes! Aína metémonos nel corazón de la nena, nos sos sentimientos. Entendemos lo que siente, los sos celos, la so murnia, el su refugu. Y allegrámonos con ella cuando llogra superar esi refugu y abrazar a la so hermana pequeña.

Les ilustraciones de Francesca Assirelli son tienres, coloristes, con un predominiu de roses y malves qu’irradien una lluz especial, espresives (especialmente neses cares con coloretes) y avérennos entá mas a la tenrura del testu.

En resume, un perguapu album pa primeros llectores, especialmente p’aquellos que tienen por llegar -o ya en casa- un hermanin nuevu ante’l que posiblemente sientan lo mesmo que la nena protagonista d’esti llibru.

La mio hermana ye una mofeta ta editáu n’asturianu y en castellán y va ser editao n’alemán el próximu mes de marzu pola Editorial Ellermann, perteneciente al grupu Oetinger. Esti album vien d’algamar el Premiu Críticu de les Lletres Asturianes (2012) na categoría de lliteratura infantil y xuvenil.

 

Berta Piñán (Cañu, Cangues d’Onís,1963) ye una de les nueses escritores n’ asturianu más reconocies y premiaes. Dexando un llao la so obra p’adultos y n’especial la poética, po la que ye sobradamente conocida, la so obra pa públicu infantil empecípiase con Lula, Lulina (Trabe,1996) y sigue con El branu de Mirtya (Ambitu, 2005), con illustraciones de Pablo Amargo; Les cosas que le gustan a Fran (Hotelpapel, 2005), L’estranxeru, Les coses que-y presten a Fran (Trabe, 2008) y Arroz, agua y maíz (Pintar-Pintar, ediciones en 2009 y 2010) obra galardonada col Premiu “María Josefa Canellada” de Lliteratura Infantil y Xuvenil 2008.

 

 

Francesca Assirelli (Napolés 1977) Estudió pintura na Academia delle Belle Arti de Napoles. Fixo cursos d’ilustración en Nápoles, Venecia y Sarmede. Publicó con Giunti, San Paolo, RBA, Lisciani Giochi, Sinnons, Agaworl (Korea), Pintar Pintar, Kar-Ben Publishing (USA), Childplay (UK), Edizione eveille & Découvertes (Francia). Participó en diverses esposiciones y concursos. Ilustró yá más d’una ventena de livros pero la neña de La mio hermana ye una mofeta ye’l so personaxe preferíu.Vive y trabaya en Roma.

 

 

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias