La Tertulia Malory escueye ‘Memoria de Tuña’, d’Antón García, como meyor llibru n’asturianu del añu 2019

La Tertulia Malory escueye Memoria de Tuña, d’Antón García, como meyor llibru n’asturianu del añu 2019. El fallu del premiu –el novenu dende la so creación– fíxose’l vienres 4 de setiembre nun actu que se celebró nel pub Tom Malory de L’Entregu, séde la tertulia lliteraria dende 1998.

El xuráu tuvo formáu polos escritores Xulio Arbesú, José Luis Rendueles, Solinca Turbón, Pablo Rodríguez Medina, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 4 de setiembre de 2020.

El xuráu destacó, nel acta del fallu, «La novela guarda una unidá tonal, l’autor ye quien a construir, a partir de la señaldá y el sentimientu, un universu simbólicu, onde con emoción controlada facer un homenaxe al pueblu, la familia, la infancia y la tradición”, amás de la calidá de la producción lliteraria n’asturianu del añu 2019, lo que fixo que la decisión de premiar la novela d’Antón García se garrara por mayoría.

El gallardón consiste nuna ilustración de Alfonso Zapico y una medaya conmemorativa, que se van entregar nun actu públicu en L’Entregu en feches próximes.

Esta ye la novena vez que’l grupu concede esti premiu, l’añu pasáu resultó ganador Incorrectos, novela de David Artime y n’ediciones anteriores, premiáronse les obres El llibru póstumu de Sherezade, de Raquel F.Menéndez, Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga.

Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Memoria de Tuña ye la cuarta obra narrativa d’Antón García depués de El Viaxe (1987), Díes de muncho (1998) y Crónica de la lluz y la solombra (2015). Col paisaxe común de Tuña l’autor llevanta una novela fragmentaria qu’argaya l’alma dende una prosa llimpia y contenida, l’esiliu de los familiares más allegaos del xeneral Riego en Llondres, les carbonerines de rapiña, Hemingway pescando salmones, les sentíes pallabres del últimu presidente de la República o la figura de Pelayo, dánse la mano nun universu creáu en Tuña, un universu onde reposen toles esperances y emociones del ser humanu y onde se mecen los caminos, ún a ún, del mundu enteru. Ye la memoria d’un pueblu y al empar, la memoria mesma de la vida.

Antón García (Tuña, 1960) Escritor y editor, ye ún de les principales figures de la lliterartura asturiana del Surdimientu. Llicenciáu en filoloxía española pela Universidá d’Uviéu, como editor funda les editoriales Tsibros de Frou (1983-1988), Trabe (1992) y Saltadera (2007). Tien cuatro noveles publicaes, El Viaxe (1987), Díes de muncho (1998), Crónica de la lluz y la solombra (2015), y Memoria de Tuña (2019), como poeta tien escrito, Estoiru (1984), Los díes repetíos (1989), Tierra adientro (2007), La mirada aliella / La mirada atenta (2011) una antoloxía billingüe onde reúne los llibros anteriores con dalgún poema inéditu, y Ferralla (2016). La so poesía ta parcialmente traducida al castellanu, francés, catalán, vascu, alemán, portugués, gallegu, occitanu y rusu. Ye autor amás de diferentes obres d’investigación lliteraria y ensayos, y director de numberoses revistes, ente elles Adrei, Zimbru o Campo de los Patos.

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias