Nuevu númberu de ‘Formientu, Revista de lliteratura muy moza’

El númberu 11 de la revista de lliteratura “mui” moza, Formientu, ta yá fuera d’imprenta. La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. Con esta nueva entrega ábrese una etapa nueva, pasando de dos a un solu númberu al añu, pero con más páxines, de 30 a más de 70, y con una edición más curiada.

Esti númberu cunta con testos de Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y una crítica lliteraria de Javier Cubero.

Amás estrénase la sección “Cuando… yera autor mozu” dedicada nesti casu a Pin de Pría. Na sección búscase dar la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión ye “Llibertá”, asoleyáu por Pin de Pría con 23 años.

Les semeyes qu’ilustren la revista son d’Alejandro Ordiales, fotógrafu mozu llangreanu, y el diseñu y maquetación del moscón Andrés Alonso Moutas, como vien siendo vezu dende’l númberu 4 de la revista. Ye oxetivu de Formientu’l dar a conocer a artistes asturianos mozos y nesta nueva etapa va facer por dir dando a conocer a nuevos fotógrafos asturianos.

Ta pesllándose’l calendariu de presentaciones pero yá pue confirmase una nel Club de Prensa de LNE en Xixón, pal 11 d’abril, asina como otres dos n’Uviéu y Corvera, que dirán anunciándose nes selmanes vinientes.

(26 de febreru de 2012)