Presentación de ‘Folganza’ de Ismael María González Arias

El martes 23 d’ochobre a les 19:30 hores, en La Llocura Llibrería-Café de Mieres, Ismael María González Arias va presentar Folganza, editao por Saltadera. Nel actu van participar, amás del autor, Sonia Fidalgo, Vanessa Gutiérrez, Javier Neira Estrada, Chus Pedro Suárez y Antón García.

Esti llibru recueye los artículos d’opinión escritos ente 1997 y 2001. Equí ta’l socialismu omnipresente camín de ningures, el sindicalismu toupoderosu ocupáu en perfacer una Asturies lluella, la derecha ridícula y acomodada, l’asturianismu esfondáu, el comunismu irrelevante… Nestes páxines va xuntase lo social y lo económico, la política internacional y la local, les diversiones populares y l’alta cultura… too entecallao de referencies intelixentes, que sorprienden y enseñen, too ello cuntao con descaru, de manera divertida, pero con un puntu críticu y acedu que llevanta angüeñes, desavezada como ta la sociedá asturiana a que naide-y diga les verdaes de manera lúdica y llinguatera.

Ismael María González Arias (Uviéu, 1958). Medró y vive en Mieres del Camín, onde ye’l director de la so Casa de Cultura. Ye colaborador habitual nos medios de comunicación d’Asturies, tanto de los escritos como de los audiovisuales. Nel ámbitu de la música tien fecho llabores de compositor, productor, críticu y estudiosu, recibiendo en 1997 el Premiu d’Ensayu «Fuertes-Acevedo» pol so llibru L’asturianada (escritu en colaboración con Xaime Arias). Como narrador ganó en dos ocasiones el Premiu de Novela «Xosefa Xovellanos»: El cuartu negociu (1992) y En busca de Xovellanos (2005) y una’l Premiu «María Josefa Canellada» de Novela Xuvenil por Les puertes del paraísu (2009). Tien publicaes otres cinco obres de narrativa, amás d’ensayos, cronoloxíes musicales, cancioneros y otros llibros.