Presentación del llibru ‘La cafiante muerte de Nicolai Bostov’ de José Ángel Gayol

El xueves día 22 d’avientu, preséntase na Biblioteca de Asturias “Ramón Pérez de Ayala” la novela La cafiante muerte de Nicolai Bostov, de José Ángel Gayol, obra ganadora del XLII Premiu Xosefa Xovellanos publicada agora por Ediciones Trabe. L’actu va facese a les 19:00 y na mesa va acompañar al autor l’escritor Julio Arbesú Rodríguez.

La cafiante muerte de Nicolai Bostov ye una sátira social que con un humor esperpéntico y bien corrosivo, retrata la sociedá asturiana de finales del sieglu XX.

José Ángel Gayol (Mieres del Camín, 1977) ye escritor y críticu lliterariu d’amplia formación y inquietúes varies. Poeta de voz propia (Los poemes del oriental, 2013; El llibru de les coses misterioses, 2013; Los suaños y los díes, 2014; y Una selmana y otros díes, 2015), mostróse como ensayista amenu y arteru en Vértigu. L’atracción del abismu na sociedá contemporánea (2016), col qu’algamó’l Premiu «Máximo Fuertes Acevedo» d’Ensayu 2015; Exercicios d’asturianu (2016), recopilación de testos a mediu camín ente l’artículu lliterariu y d’opinión, y l’espléndidu y novedosu El silenciu invisible (2020), Premiu «Máximo Fuertes Acevedo» d’Ensayu 2019. Avezáu escritor con alma d’ensayista, tien escritu’l diariu En primera persona (2019), nel que s’amuesa como agudu observador y rexistrador de la realidá al empar qu’indagador de la verdá. Como narrador diose a conocer cola guapa novela Argonautes (2007), a la que siguió La xeometría secreta del azar (2020). Nel 2021 ganó’l Premiu de Novela «Xosefa Xovellanos» cola obra La cafiante muerte de Nicolai Bostov.