Presentación del proyectu ‘Les pallabres que nos mueven’

El vienres 19 d’avientu, a les 20 hores, la llibrería El Bosque de la Maga Colíbrí (Cai Rufo Rendueles, 9) va acoyer la presentación del proyectu bautizáu Les pallabres que nos mueven, del que ye responsable l’escritor Héctor Gómez Navarro. Dichu actu va cuntar cola presencia del diseñador Job Sánchez y los poetes Vanessa Gutiérrez y José Luis Rendueles.

Les pallabres que nos mueven ye una iniciativa que, cola fin de promocionar la poesía escrita n’asturianu, va consistir na amuesa de poemes de diferentes autores nel tresporte públicu y espacios asociaos de la ciudá de Xixón a partir d’esti mes d’avientu.

Héctor Gómez Navarro (Xixón, 1983) ye llicenciáu en Filoloxía Hispánica pola Universidá d’Uviéu. Forma parte de la coordinación de Hesperya, asociación cultural qu’axunta una revista, un pequeñu proyectu editorial y la organización del alcuentru de poesía La Ciudad en Llamas. Aparez nes antoloxíes Ladran los perros (Pluma Libre, Perú, 2007), La edad del óxido (Laria, Uviéu, 2009) y 50 maneras de ser tu amante (Puntos Suspensivos, Xixón, 2010). Fue “Poeta del Alba” en Candás en 2003 y tien dao talleres de llectura en centros municipales. En 2012 publicaba’l llibru Historia de Todos (Trabe) que fue premiu Asturias Joven de Narrativa.