Publícase ‘Memorial del monstruu’, Premiu Montesin de Lliteratura Xuvenil

Trabe Editorial asoleya, na so colección Pesllera, la novela que ganara del Premiu Montesín de Lliteratura Xuvenil 2010, premiu que convoca la propia editorial en collaboración cola Conseyería de Cultura y Deporte: Memorial del monstruu, de Dolfo Camilo Díaz.

El xuráu fuera formáu por María Antonia Pedregal Montes, María Xosé Rodríguez López y Severino Antuña González, baxo la presidencia d’Esther Prieto Alonso y actuando como secretariu Inaciu Iglesias Fernández, decidiendo conceder por unanimidá’l premiu a la obra del prolíficu escritor ayerán afincáu n’Avilés. Toos destacaron la so bien tramada estructura narrativa, amás del fondu conocimientu de l’Asturies del sieglu XVIII na que se desenrolla.

Con técnica mui cinematográfica, la narración va esgranando la llucha ente ciencia y superstición que se dio nel Sieglu de les Lluces, una centuria bien apasionante y poco lliteraturizada na historia d’Asturies: Al acabu la so vida, un flaire benedictín atopa nuna tronza de carbayu que sofita la so cama y que contaba vacia cuatro resmes de papel, de les que yá nun tenía alcordanza, que narren –de so mano moza– los fechos asocedíos na ivernada del 1729. Nunca nun tuviera –confiesa– tan cerca del mal como naquellos díes, nos qu’un cuélebre escomanáu andaba faciendo les d’elli pel occidente d’Asturies.

Esta ye la historia de maese Buciellos, cazador de cuélebres, y del so ayudante Antón. Entrambos los dos han d’enfrentase al mal n’estáu puru, al so pasáu el más vieyu y a un futuru inciertu el más mozu. Una suxerente novela, perfecta p’averar la lliteratura asturiana a los llectores xuveniles.

(29 de febrero de 2012)