Suelta de Llibros en Corvera

La Suelta de llibros ye una actividá entamada pol Serviciu de Normalización Llingüística de Corvera, fecha en collaboración cola OIJ del Ayuntamientu Corvera y les asociaciones xuveniles corveranes Refugio 101 y Atalaya, y graciestamién a la donación desinteresada de llibros al cargu de l’Academia de la Llingua Asturiana, la Oficina de la Llingua de Xixón y de les editoriales asturianes Asturtoons, Saltadera, Suburbia y Trabe.

La Suelta de llibros busca fomentar al empar la llectura n’asturianu y el conocimientu del conceyu de Corvera. Asina les coses, ente’l 30 d’abril y el 9 de mayu, nel marcu de la Folixa del Llibru, van repartise pelos ramales del Camín de Santiagu per Corvera 75 llibros n’asturianu, ente los qu’hai dirixíos pa la reciella, pa la mocedá y pa xente más mayor; hailos d’ensayu, de poesía, de narrativa, de teatru, etc.

Esa primer Suelta de llibros daráse a conocer con fotos feches polos organizadores y polos collaboradores de l’actividá nos medios del Ayuntamientu; depués el protagonismu va treslladase a toes aquelles persones que topen los llibros, yá qu’en lleéndolos van tener que volver asitialos n’otros llugares de Corvera y mandar les fotos correspondientes al corréu del área de Cultura (cultura@ayto-corvera.es), cola fin de qu’otres persones más puedan lleer esos llibros y conocer al empar Corvera.