Xune Elipe, Xuacu Amieva, Chús Pedro: “Tres ‘histories’ con historia”

Son auténticos buques-insignia de la música asturiana, quien quiera acercarse a ella necesariamente tendrá que revisar su obra pues, cada uno en su género, han sido, son, y serán un auténtico referente. Les une un firme compromiso por la llingua y la cultura de Asturies y en esta entrevista, que ellos mismos se han realizado, hemos querido mantener ese compromiso.

Xuacu Amieva: ¿Cómo se podría definir un músicu asturianu? ¿Cómo un artista, un instrumentalista con oficiu, un lluchador por una cultura…?

Chus Pedro: Ye un cóctel de coses… hai una parte de creación y si pol fechu de ser creador te quieren nomar como artista, bien, pero nun hai dulda de que tenemos muncho d´artesanos. En xeneral somos artesanos de la música y de la cultura, militantes, activistes y dinamizadores d´una cultura musical asturiana, qu´enllaza música, llingua y tradición. Tamién ye un compromisu coles llibertades, too eso forma esi cóctel, non precisamente “molotov”.

Los tres vinimos a la música dende diferentes ángulos, dende diferente formación y con diferentes pretensiones, somos tres histories con historia, con una historia en común y compartida. Nuberu caracterízase principalmente por tres coses: pola defensa d´una llingua, pol espardimientu de la tradición musical, envolviéndola d´una forma contemporánea, y pola llucha poles llibertades. Yo empecé a cantar por razones ideolóxiques, asina que nun puedo considerame un artista. Ensin dame cuenta fixi de la mio vocación una profesión, lo primero pa mi yera´l compromisu políticu, el compromisu cola sociedá d´esti pequeñu país.

Xune Elipe: Estos dos señores tienen una mayor formación musical y ye probable que tengan otru conceptu de lo que ye la música. Dixebra ye productu de la frustración que representara la transición n´Asturies. Teníemos munches esperances puestes na Autonomía y nel reconocimientu oficial de la nuesa llingua. Too eso nun llegó y nun va llegar cola xente que tenemos agora tovía. Somos productu d´ello. Coincido con tolo qu´acaba de dicir Chus, anque venimos del rock más que de la música tradicional. Yo enantes que músicos creo que somos activistes musicales, que ye otra cosa completamente distinta. Agora yá ta más equilibrao, pero al principiu yera más importante´l mensaxe que la música.

Teniendo en cuenta la situación d´apartheid cultural qu´hai nesti país nel tema de la cultura y de la llingua propia, creo qu´a los músicos asturianos de momentu nun-yos queda otra. Hasta que nun se normalice la situación siempre tendremos esi “sanbenitu” a recostines. A lo meyor cuando haya un reconocimientu esplícitu a la llingua y a la cultura del país, a lo meyor, cantaremos otres coses y sedremos llibres de facer artísticamente coses distintes pero mientres tanto taremos supeditaos a la situación sociolóxica.

Chus Pedro: El vuesu orixe, l´Avilés industrial y el bucólicu Oriente d´Asturies paez tar implícitu nes vueses obres… como nel mio casu ta´l fechu de ser de la Cuenca Minera.

Xuacu Amieva: Ta claro que l´orixe y les esperiencies de la infancia dexen marca. Tamién me marcara la llegada a la ciudá, l´encuentru ente la cultura rural y la urbana d´aquella causóme un ciertu trauma. Tuvi que facer una mistura de les dos cultures, d´ehí sal la idea de tocar la gaita nun momentu nel que nun yera nada fácil, condenada como taba a la romería y a la procesión. Nos mios comienzos un gaiteru nun taba bien vistu como agora y foi una verdadera llucha, quiciabes non tanto nun contestu obreru, como nos vuesos casos, pero sí que la represión yera d´algún mou cruel con tolo que tenía que ver cola cultura asturiana. La xente de pueblu tenía interiorizao que tolo qu´ellos facíen nun tenía valor. La cultura rural taba mal visto, yera otru tipu de represión.

Xune Elipe: Efectivamente, Dixebra nun se podría dar n´otru sitiu que nun fuera Avilés. Les sos barriaes, qu´axuntaben a tola xente que vino a trabayar, non solo d´Asturies sinon tamién d´afuera, yeren el mediuambiente pa que surdiera un grupu asina. Cuando entré en Conceyu Bable pidí que me dixeren quién taba apuntáu, y el primer carné fechu n´Avilés yera´l del fíu d´un trabayador d´Ensidesa cordobés. Eso vien a ser la cume del mestizaxe. Esti contestu influyó muncho, non solo na música —cañera— sinón tamién nes lletres que son fundamentalmente  productu d´esa situación.

“Nuberu caracterízase pola defensa d´una llingua, pol espardimientu de la tradición musical, y pola llucha poles llibertades”

Chus Pedro

Xune Elipe: ¿Sois conscientes de que sois un referente pa la música asturiana? ¿Pue cohibivos esa responsabilidá a la hora d´intentar facer otru tipu de coses, otres apuestes musicales, ente´l fechu de que´l públicu que-vos sigue les refugue?

Chus Pedro: Na parte que me toca, en Nuberu siempre esistió un denominador común que foi´l llingüísticu, cola llingua como bandera, pero musicalmente Nuberu tocó tolos palos, el primer trabayu yera acústicu y con un conteníu ideolóxicu que yera un cantu al mundu del trabayu y de la solidaridá, con cantares como “Dame Tira” o “Aida de la Fuente”. El segundu musicalmente yera rock sinfónicu, con “Volvamos a entamar”, “Dios te llibre de Castiella” y “Marcha céltica”, pieza que tocaba Manolo Quirós, que nos años 70 fuera un innovador. En Nuberu abrióse una ventana a la gaita. Yera un discu nel que s´intentaben rescatar les señes d´identidá d´un país, que taben escaecíes.El tercer discu trataba de bucear na tradición con cantares como “Tengo de rondar to valle”, “Carretera d´Avilés” o en “No alto´l Puertu Ventana”, pa envolveles nun conteníu musical totalmente pop cola intención de llevar la tradición asturiana a les nueves xeneraciones. Yo fixi siempre lo que quixi, nunca me condicionó nin Dios nin me va condicionar pa siguir faciendo lo que voi siguir faciendo. Tocamos tolos palos, l´acústicu, el sinfónicu, el poperu y el rockeru, col “Atiendi Asturies”del añu 80, siempre baxo´l denominador común de la llingua asturiana.

Xuacu Amieva: Siéntome referente pa toles xeneraciones de gaiterinos que salieron de la mio escuela, qu´a lo meyor foron 500, munchos d´ellos d´ésitu, como los hermanos Tejedor, Flavio, Rodrigo, Oscar Fernández, Ricardo Soberá, etc. Amás, cuando esta xente vien a pidite

un autógrafu un día, sí que te faen sentir como un referente. Esto nun quier dicir que pueda baxar la guardia, tengo de siguir trabayando mui duro. Nos mios anicios los referentes yeren xente como Gwendal o Stivell, y quedaba un duru trabayu pa dignificar la gaita. Nel mio discu Onde l´agua ñaz, yá quixi dexar constancia de toles posibilidades qu´ofrez la gaita, con tolos instrumentos autóctonos y non autóctonos, misturándola per primera vez cola flauta travesera, col rabel, cola arpa y l´acordión. Quedó un disco mui guapu que m´ayudó a siguir nesa dinámica. Más alantre metí-y voz y asina hasta güei, onde la evolución llega a estilos como´l pop, rock, la bossanova o el swing. Nun tengo nengún prexuiciu y la referencia que yo pueda ser nun m´impide´l ser llibre a la hora de crear. Los músicos en xeneral y los asturianos en particular tenemos qu´arriesganos a la hora de facer los nuesos trabayos.

Xuacu Amieva: ¿Cómo veis la posibilidá de que la música de nueso trescienda a nivel internacional?

Xune Elipe: Probablemente vosotros tengáis más esperiencia en tocar per fuera. Nós somos a  lo meyor de los grupos que n´Asturies tocamos más dientro d´Asturies. Fuera, les veces que salimos, suel ser pel norte. Más pa baxo de Madrid nunca fuéramos. Agora yá salimos ensin nengún complexu, cola mesma calidá y l´espectáculu que pue ufiertar cualquier otru grupu. Eso sí, creo que tien más méritu lo nuestro, cuando nos falen de producciones, lo qu´hai que tener en cuenta ye´l sofitu que tienen les bandes por parte de los medios de comunicación y sobre too por parte de les instituciones n´Escocia, Irlanda o n´otros sitios. L´apoyu que tenemos equí ye cuasi inesistente. Eso sí, siempre salimos cantando na llingua de nueso, dalgo que ye mui apreciao fuera. Nun tenemos problema nengún pol fechu llingüísticu.

Chus Pedro: Dende´l nuestru puntu de vista, efectivamente, el problema nun ye llingüísticu, ye ideolóxicu. La música ye un llinguaxe universal, lo importante ye ser quien a llegar al corazón de la xente, eso pa mi ye fundamental. Los músicos d´Asturies y los diferentes sectores de la sociedá asturiana tienen un problema: los asturianos, en xeneral, somos malos vendedores. Nun sabemos vender lo nuestro, somos unos bonos compradores, empapámonos como les esponxes de tolo que vien de fuera, tamos acostumaos a la colonización y dexámonos que nos colonicen, abrímonos de pates a tolo de fuera y zarramos les pates a tolo de dientro.

Otru problema ye qu´hai una industria discográfica n´Asturies, pero esa industria nun ta articulada y tamos como lo que siempre fuimos, col minifundiu, perdiéndonos pela caleya. Somos un poco ruinos, na música y en tolos sectores de la sociedá.

Tuvi suerte de poder cantar en festivales de tol mundu y si lleves una bona banda, si cantes ensin imitar a naide, como te sal del alma, si cantes de corazón, ye difícil nun llegar a comunicar.

“enantes que músicos somos activistes musicales”

Xune Elipe

Chus Pedro: Asturies tien un nivel de producción discográfica mui superior al d´otres autonomíes como Catalunya, Galicia y Euskadi. L´añu pasáu ficiéronse ochenta y picu discos, pero tal númberu de producciones nun va acompañao de ventes. Nengún productu trespasó les fronteres con potencia, lo que facemos de Tinamayor a Vegadeo y de Peñes a Payares, queda equí. ¿A qué vos paez que se debe esto?

Xuacu Amieva: Básicamente ye porque cualquier discográfica llega a la producción, pero nun llega al trabayu de promoción. Nenguna compañía tien el poder de nin siquiera aprosimase a les compañíes nacionales y muncho menos a les multinacionales. Esi ye´l principal problema. Ganes hai. L´esfuerzu de la promoción d´equí al final depende del propiu músicu. Lo ideal sedría qu´otros trabayaren pola difusión.

Xune Elipe: Efectivamente, sobre too tal y como ta´l show-bussiness del Estáu Español, onde dende va unos años p´acá´l que manda ye “don dineru”, pero ye una cuestión que nun-nos afecta solo a nosotros, tamién-yos afecta a los sellos discográficos del restu de les músiques que se faen nel restu de países del Estáu. A parte de los cuatro nomes que nos vengan a la cabeza como Luar na lubre, Kepa Junkera, Hevia y Carlos Núñez, que graben toos con multinacionales, ¿qué otra música conocemos de lo que se fai, por exemplu, n´Aragón? Nada. Ye una cuestión que nos afecta a nós, pero non porque seyamos asturianos. Sí, toi d´alcuerdu en que munches veces los asturianos siguimos nel tiempu les tribus, eso de que yo toi nel castru míu metíu y que nun venga naide a molestame…falta daquién qu´una a la nación. Nesti momentu l´Alministración debería encargase de facer eso, sabiendo vendelo, creando, por exemplu, una marca de productu: “música asturiana”.

Xune Elipe: Quería preguntavos sobre la profesionalidá nel músicu asturianu, que ye un poco como la pescadiella que se muerde la cola: como nun tenemos l´ésitu suficiente nun nos podemos profesionalizar, como nun nos profesionalizamos nun podemos facer por tener ésitu suficiente…

Chus Pedro: Yo fui un profesional de la música dende´l añu 77 al 84. Viví a tiempu completu pa la música. Nos ochenta hubo una crisis tremenda na industria musical, pola entrada del videu, que robó muncho mercáu al discu, asina que tuvi que compaxinar l´actividá musical col mundu de la empresa, pero nel añu 2001 decidí recuperar la mio profesionalidá y así hasta agora, que sigo viviendo por y pa la música. Dalgunes veces ye difícil yá que los cachés que se manexen güei son hasta simbólicos. Hai xente del nuesu gremiu que se pega por xubir a un escenariu y nun dignifica´l so salariu. Un salariu que radica nos royalties de les compañíes polos discos que venden, nos derechos d´autor y nes gales que se puedan facer. A partir d´ehí hai que dir tirando a base d´esfuerzu y de creer no que faes. Lo que tengo ye una ilusión mui grande, recuperé aquella de los años setenta. Soi un tío mui feliz faciendo lo que fago, pa ello nun necesito ser millonariu nin tar nos tops de les llistes de discos.

Xuacu Amieva: No que se refier a la gaita, la profesionalidá, polo menos nel mio casu, foi faciéndose poco a poco. Vivir de la gaita yera difícil naquellos momentos nos que la llucha yera a muerte pa dignificala. Agora, colos años, pue dicise que soi profesional de la gaita al dir alternando les clases qu´imparto colos conciertos y el facer discos. Prestaríame dedicame a los conciertos, tener una xira mundial y dedicame más a componer, pero nun puedo dexar de llau les clases yá que son les que me dan un sueldu fixu tolos meses. Nel mio casu, anque llevo 6 discos en solitario, nunca me plantegué que me dieren perres, en cada discu vas tratando de recuperar lo qu´inviertes y anguaño tienes l´inconveniente de que tán llistos pa dercargar n´internet al día siguiente que salen al mercáu.

“Nos mios comienzos un gaiteru nun taba bien vistu… foi una verdadera llucha”

Xuacu Amieva

Xuacu Amieva: ¿Cómo pue influyir esti fenómenu d´internet nos nuevos trabayos que fagamos?

Chus Pedro: El formatu anguaño hai que cambialu. Les multinacionales tienen que sirvir tamién pa daqué, nesti casu pa copiar d´elles. A esi nivel habrá muncha xente buscando mecanismos innovadores pa la industria yá que nesti momentu dende internet pues facete col CD, el llibretu y la carátula a coste ceru. Del “top manta”, que voi dicivos, yo vi a profesionales de la política comprando CDs al probe inmigrante, ¡hasta equí llegáramos, señores!

Xune Elipe: Ye tamién una cuestión de cultura musical. La xente mozo, agora, en xeneral, tien mui poca cultura musical. La nuesa xeneración entá la caltenía. Notóse muncho´l pasu de lo que yera´l vinilu, que s´entendía como una obra d´arte, con aquelles carátules grandes feches artísticamente, al CD, que lu vimos como daqué más utilitario, d´andar per casa. Ente toos la mataron…ye difícil esplicar cómo les multinacionales te vendíen un discu a más de venti euros y agora, cola crisis, con menos d´esos venti euros dante un doble discu, un DVD, llibretos, etc. El nivel de precios que llegaron a imponer a les tiendes taba mui penriba de lo almisible. Hai bastante hipocresía cuando se refieren a les pérdigues, que nun son pérdigues económiques reales, son recortes en beneficios.

Chus Pedro: pídennos que recomendemos a los llectores tres discos de la música asturiana. Yo téngolo mui claro, pal que quiera empapase d´Asturies y de la so pluralidá musical, equí tamos tres exemplos. Qu´acuchen la obra de Xuacu Amieva, que les xeneraciones moces s´empapen d´esi rock asturianu de Dixebra y qu´ascuchen cantares de Nuberu y de Chus Pedro. Tres palos diferentes pa tres histories con historia.

Xune Elipe: Yo afinaría un poco: Onde l´agua ñaz, de Xuacu Amieva, creo que ye l´aniciu de munches coses dientro del mundu de la gaita n´Asturies. Tolos gaiteros mozos deberíen tener esa obra como discu de cabecera, a partir d´ehí abrióse la “caxa de Pandora” y empezaron a salir los troníos. De Nuberu tengo una referencia mui personal: Atiendi Asturies, Atiendi, que ye unu de los grandes discos fechos n´Asturies. Yo entá lu ascucho güei y prestaríame facer una versión “rockanrolera”, solo fadría falta meter mayor distorsión a la guitarra eléctrica, lo demás yá ta too. Y a nivel particular, quedaríame col últimu discu nuestru que ye un compendiu de los 20 años de Dixebra, tamién ye interesante´l DVD, yá que´l directu ye dalgo mui representativo nuestro.

Xuacu Amieva: De Nuberu, lo que más m´impresionara foi´l so primer discu, dende´l puntu de vista de les lletres, la musicalidá, les voces… amás impactóme´l directu d´ellos, concretamente´l que se fizo en “Los Maizales”, en Xixón, que yá llovió. De Xune y Dixebra, efectivamente, quedaríame col últimu, ye mui representativu. Y de la mio carrera discográfica, anque se tien cariñu a tolos discos, nun cabe dulda que la última obra qu´unu tien más reciente ye la que más aprecia, d´ehí Seis, que pue ser mui interesante d´ascuchar, sobre too pa les xeneraciones moces.

Xune Elipe

Xulio Andrés Elipe Raposo, Xune (Avilés, 1962), cantante y productor discográficu, ye´l líder de la banda Dixebra, que dende 1987 vien siendo´l grupu más representativu del rock asturianu, editando hasta l´actualidá nueve discos. L´últimu d´ellos, Dixebra n´acción, ta acabante salir y ye la grabación en directu del conciertu del so XX aniversariu (vien tamién con un DVD de l´actuación y otros materiales). En 1992 funda´l sellu discográficu L´Aguañaz, col so compañeru de Dixebra, el gaiteru Fernando Rubio. Espubliza en 1996 el llibru Llingua y rock, un estudiu sobre la música rock con lletres n´asturianu. Tamién foi miembru d´organizaciones nacionalistes como Conceyu Bable, Ensame Nacionalista Astur y Andecha Astur, acabando por presentase como candidatu independiente a l´alcaldía d´Avilés. Periodista en llingua asturiana en dellos medios de comunicación como Cadena SER, Radio Popular de Avilés o La voz de Avilés (onde dirixera la sección La fueya´l Carbayu), anguaño compaxina la so actividá en Dixebra y L´Aguañaz col so llabor periodísticu nel selmanal Les Noticies y, dende ochobre de 2006, col programa que tien na Radio del Principáu, Rockmería.

Xuacu Amieva

(El Mazucu, Llanes, 1954). Maestru de gaiteros, distínguese pol llabor de recuperación del patrimoniu cultural y musical asturianu, siendo fundador de gran númberu de bandes y grupos folclóricos. Tamién destaca la so creación musical, que ta reconocida a nivel mundial con premios de prestixu como´l troféu Macallan del Festival Intercélticu de Lorient o el propiu Grammy. Interesáu na música tradicional astur, participa en delles agrupaciones folclóriques como Raigañu, Urogallos y Andecha Folclor d´Uviéu. Nellos fai un importante llabor de recuperación tanto de músiques como d´instrumentos populares como´l rabel o la bandurria asturiana, la zanfona o gaita de rabil, la trompa o arpa de boca, la flauta travesera de madera, les tarrañueles, los pitos, el pandeiru cuadráu… Nel so afán por caltener les tradiciones crea en 1980 n´Uviéula Escuelade música tradicional, de la que más tarde tendría qu´abrir delegaciones n´otros puntos de la rexón. Nestes escueles naceríen dalgunes de les primeres bandes de gaita asturiana. A la vez caltiense activu fundando grupos folk como Beleño y Ubiña. En 1990 formó´l grupu Xuacu Amieva. En 1995 collaboró colos irlandeses The Chieftains nel discu Santiago, tocando´l tema “El besu”. Dichu discu algamó´l Grammy nel añu 1997. Anguaño ta acabante salir el so últimu discu tituláu Seis.

Chus Pedro

Chus Pedro Suárez (L´Entregu, 1955). El so compromisu social llévalu nos años 60 hasta la música, primero dientro del colectivu cultural Camaretá y más tarde fundando col guitarrista Manolo Peñayos el grupu Nuberu, formación emblemática d´Asturies. Con Nuberu tien grabao una decena de discos y tienen recibío dellos reconocimientos públicos, como´l que-yos otorgara l´Academia de la LlinguaAsturiana.Nuberu tien una biografía titulada Nuberu nel tiempu y ye un grupu que vien actuando con gran ésito dientro y fuera d´Asturies. Como productor ta rellacionáu, yá dende los años ochenta, con delles empreses discográfiques: foi miembru dela Fonográfica Asturiananel añu 1984 y dende 1987 hasta l´actualidá ye ún de los tres socios propietarios de la discográfica Fonoastur.  Al marxe de l´actividá dientro de Nuberu, Chus Pedro grabó un discu en solitariu nel añu 1987 —el trabayu monográficu sobre la mina Mineros— y collaboró poniendo la so voz pa grupos como Llan de Cubel o Tejedor. L´ultimu discu en solitariu, De ñublu y orpín, algamara relevancia internacional, lo que lu llevó a tocar con Capercaille, Phil Cunningham, Nolwen Korbell o Chieftains. Una de les canciones del discu, “Agora sal a baillar”, foi galardonada col Premiu de la música a la “Meyor canción n´asturianu”.

(Publicado en Biblioasturias05)