‘Formientu’ y ‘El Príncipe Derviche’, na cellebración en Corvera del Día del Llibru Asturianu

El próximu xueves 2 de mayu, dientro del marcu del Día del Llibru Asturianu, van facese dos actos na Sala d’Arte del Centru Sociocultural de Las Vegas/Les Vegues, toos dos de calter gratuitu y d’asistencia llibre: a les 19 hores, presentación del últimu númberu de la revista lliteraria Formientu; y a les 20 hores, presentación de la novela El príncipe derviche, de Xandru Fernández.

Unes actividaes entamaes pola “Casa de la Llingua” de Corvera, que ye la manera que, dende cuantayá, gusten llamar nel conceyu corverano al so Serviciu de Normalización Llingüística y les sos instalaciones.

19 h, Presentación del últimu númberu de Formientu

La revista Formientu fundóse nel añu 2006 con un oxetivu bien claru: publicar les creaciones lliteraries de los y les autores más mozos de la lliteratura asturiana y dales a conocer.

Esa finalidá sigue calteniéndose nel númberu 11 de la publicación, onde vuelven presentase obres de les voces más nueves de la lliteratura asturiana: Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y Javier Cubero. Dalgunos d’ellos acompañarán na presentación al director de la publicación, Inaciu Galán.

20 h. Presentación d’ El Príncipe Derviche, de Xandru Fernández

Xandru Fernández (Turón, 1970) ye ún de los escritores más valoraos de la lliteratura asturiana; nesta ocasión visita Corvera pa presentar la so última novela, El príncipe derviche, cola que ganó’l Premiu Xosefa Xovellanos de novela qu’entama la Conseyería de Cultura del Principáu d’Asturies.

Autor d’obres como Los homes de bronce, Les ruines o Entierros de xente famoso, tamién tradució obres de Kafka, Thomas Mann y Nietzsche al asturiano.

El príncipe derviche ye la historia d’una bomba, sí, pero tamién ye, en palabres del escritor Antón García “un artefactu narrativu deslumbrante (…) que se construye sacándo-y el xugu a la capacidá espresiva del asturianu”.

Na presentación van participar en xunto col escritor turonés, Silvia Cosio (responsable de Suburbia Ediciones), el responsable del área de Cultura del Ayuntamientu de Corvera, Adolfo Camilo Díaz, y el técnicu de la Casa de la Llingua, Rafael Rodríguez Valdés.